टोकियो,जापान। नयाँ वर्षको पहिलो दिन (जनवरी १) टोकियो महानगर क्षेत्रमा मोची (चामलबाट बनाइने परिकार) घाँटीमा अड्किँदा ४ जनालाई आपतकालीन रूपमा अस्पताल लगिएको छ। तीमध्ये ८० वर्ष उमेरकी एक महिलाको उपचारका क्रममा मृत्यु भएको टोकियो अग्नि तथा विपद् व्यवस्थापन विभागले जनाएको छ।

टोकियो अग्नि विभागका अनुसार जनवरी १ को बिहान करिब १ बजेतिर मिनातो वार्डस्थित आफ्नै घरमा बसिरहेकी ८० वर्षीया महिलाले दाइफुकु (मोचीको परिकार) खाँदा घाँटीमा अड्किएपछि परिवारले आपतकालीन फोन गरेका थिए। महिलालाई तत्काल अस्पताल लगिए पनि पछि मृत्यु भएको पुष्टि गरिएको हो।

यसैबीच, टोकियोका विभिन्न स्थानमा ८० देखि ९० वर्ष उमेर समूहका ३ जना पुरुषलाई पनि मोची घाँटीमा अड्किँदा बेहोस अवस्थामा अस्पताल पुर्‍याइएको छ। उनीहरू सबै हालसम्म अचेत अवस्थामा उपचाररत छन्।

टोकियो अग्नि विभागले विशेषगरी वृद्धवृद्धा र बालबालिकाले मोची खाँदा सानो टुक्रा पारेर, राम्ररी चपाएर मात्र खान आग्रह गरेको छ। साथै, मोची घाँटीमा अड्किएको अवस्थामा व्यक्ति होसमा भए छाती वा चिउँडो समातेर अगाडि झुकाइ, ढाडमा थिचेर वा थप्काएर बाहिर निकाल्ने प्रयास गर्नुपर्ने जनाएको छ।

यदि व्यक्ति बेहोस भइसकेको अवस्थामा छ भने ढिलाइ नगरी सीपीआर सुरु गरी तुरुन्तै एम्बुलेन्स बोलाउन विभागले अनुरोध गरेको छ।

जापानमा नयाँ वर्षको समयमा मोची खाने चलन व्यापक भएकाले हरेक वर्ष यस्ता दुर्घटना दोहोरिने गरेका छन्। त्यसैले मोची सेवन गर्दा विशेष सतर्कता अपनाउन सम्बन्धित निकायले सबैलाई आग्रह गरेको छ।