टोकियो,जापान। नयाँ वर्षको पहिलो ३ दिनभित्र मोची (चामलको केक) घाँटीमा अड्किएर टोकियोमा ८० देखि ९६ वर्ष उमेर समूहका ७ जना पुरुष तथा महिला अस्पताल भर्ना गरिएको टोकियो अग्नि नियन्त्रण विभागले जनाएको छ।

तीमध्ये ८० वर्षीया एक महिलाको मृत्यु भएको पुष्टि गरिएको छ। विभागका अनुसार ती महिलाले जनवरी १ को बिहान करिब १:१० बजे टोकियोको मिनातो वार्डस्थित आफ्नै घरमा दाइफुकु (मोची) खाँदा घाँटीमा अड्किएको थियो। उनलाई तत्काल अस्पताल लगिएको भए पनि अस्पताल पुग्नासाथ मृत घोषणा गरिएको जापानी सञ्चारमाध्यमले जनाएको छ।

गत वर्ष पनि यही अवधिमा टोकियोमा मोची घाँटीमा अड्किएर ९ जना अस्पताल भर्ना भएका थिए, जसमध्ये २ जनाको ज्यान गएको थियो।

स्वास्थ्य निकायहरूले मोची सेवन गर्दा विशेष सावधानी अपनाउन आग्रह गर्दै आएका छन्। मोची खानु अघि चिया वा सुप पिएर घाँटी भिजाउने, मोचीलाई सानो–सानो टुक्रा पारेर खाने, हतार नगरी बिस्तारै चपाएर निल्ने जस्ता उपाय अपनाउन सुझाव दिइएको छ।

जापानमा नयाँ वर्षको समयमा परम्परागत रूपमा परिवारहरूले ओजोनि सुप पकाउने र त्यसमा मोची हालेर खाने चलन छ। तर विशेषगरी वृद्धवृद्धाका लागि मोची सेवन गर्दा जोखिम हुने भएकाले थप सतर्कता आवश्यक रहेको स्वास्थ्य अधिकारीहरूको भनाइ छ।