नारिता, चिबा। टोकियो नजिकैको नारिता अन्तर्राष्ट्रिय विमानस्थलले टर्मिनलमा यात्रुहरूले छाडेर जाने सुटकेसको समस्या कम गर्न कपडा कम्प्रेस (सानो बनाउने) गर्ने मेसिनको परीक्षण सञ्चालन गरेको छ। नारिता इन्टरनेशनल एयरपोर्ट कर्पोरेसन (एनएए) ले यो पहल यात्रुहरूको सुविधा बढाउन र पछिल्ला वर्षहरूमा तीव्र रूपमा बढेको छाडिएका सुटकेसको समस्यालाई सम्बोधन गर्न थालेको जनाएको छ।

एनएएका अनुसार, आगामी दिनमा शुल्कसहित यो मेसिन परीक्षण गर्ने र सफल भएमा पूर्ण रूपमा लागू गर्ने योजना छ। बैंकको एटीएम जत्तिकै आकारको यो मेसिन टोकियोस्थित कपडा कम्पनी एसजोय (Sjoy Co.) ले करिब चार वर्ष लगाएर विकास गरेको हो। धातु प्रशोधन मेसिनबाट प्रेरित भई बनाइएको यस उपकरणमा प्रयोगकर्ताले करिब १० सेन्टिमिटर उचाइ, १५ सेन्टिमिटर चौडाइ र ३० सेन्टिमिटर गहिराइको ठाउँमा कपडा राखेर ढकनी बन्द गरी बटन थिच्छन्। करिब तीन मिनेटमा प्रक्रिया पूरा हुन्छ र खोल्दा कपडा पुनः पहिलेकै अवस्थामा फर्किने कम्पनीको दाबी छ।

पश्चिम जापानको शिकोको क्षेत्रबाट पत्नीका साथ नारिता आएका टोकियोको इताबाशी वार्डका तीसको दशकका एक कर्मचारीले दुईवटा ज्याकेट कम्प्रेस गरे। उनले भने, “अब मेरो ब्याकप्याकमा थप ठाउँ बन्यो। घर फर्किनुअघि विमानस्थलमै केही स्मृति–उपहार किन्न सक्छु।”

विदेशी पर्यटकको संख्या बढेसँगै नारिता विमानस्थलमा छाडिएका सुटकेसको संख्या पनि तीव्र रूपमा बढेको छ। एनएएका तथ्यांकअनुसार, आर्थिक वर्ष २०२० मा एक सय चौबीस वटा मात्र रहेका यस्ता घटना आर्थिक वर्ष २०२४ मा १ हजार ७३ पुगेका छन्, जुन आठ गुणाभन्दा बढी वृद्धि हो। धेरै यात्रुले सामान नअट्दा विमानस्थलमै नयाँ सुटकेस किनेर पुरानो त्यहीं छाड्ने गरेको एनएएको अनुमान छ।

एनएएको विमानस्थल योजना विभागकी अकारी साइटो भन्छिन्, “अत्यधिक भरिएका र बन्द हुन नसक्ने सुटकेससँग संघर्ष गरिरहेका यात्रुहरू हामीले बारम्बार देख्छौँ। यो सेवा त्यस्तो समस्याको समाधानमा सहयोगी हुने हाम्रो अपेक्षा छ।”