टोकियो, जापान।
जापानमा तीव्र रूपमा बढ्दै आएको विदेशी पर्यटक आगमन सन् २०२६ मा भने पहिलो पटक घट्ने प्रक्षेपण गरिएको छ। जापानको प्रमुख ट्राभल एजेन्सी जे टी बी (JTB) का अनुसार सन् २०२६ मा जापान आउने विदेशी पर्यटक संख्या करिब ४१.४ मिलियन रहने अनुमान गरिएको छ, जुन सन् २०२५ को अनुमानित ४२.६ मिलियन को तुलनामा करिब २.८ प्रतिशत ले कम हो।

कोरोना महामारीअघि सन् २०१९ मा जापान आएका विदेशी पर्यटक ३०.८८ मिलियन थिए। महामारीपछि पुनः बढ्दै गएको पर्यटक संख्या सन् २०२४ मा ३६.८७ मिलियन पुगेको थियो।

जे टी बी का अनुसार चीन सरकारले आफ्ना नागरिकहरूलाई जापान भ्रमण नगर्न जारी गरेको ट्राभल एडभाइजरीका कारण सन् २०२६ मा पर्यटक आगमनमा नकारात्मक असर पर्ने देखिएको हो। चीन र हङकङबाट आउने पर्यटक जापानको कुल विदेशी पर्यटकको करिब एक तिहाइ हिस्सा ओगट्ने भएकाले त्यसको प्रभाव समग्र संख्यामा पर्ने बताइएको छ।