टोकियो,जापान। जापान सरकारले अन्तर्राष्ट्रिय स्तरमा बढ्दो प्रतिस्पर्धाबीच विश्वभरका प्रतिभाशाली विद्यार्थी आकर्षित गर्ने उद्देश्यले ३ विश्वविद्यालयमा विदेशी विद्यार्थी भर्ना कोटा (सीमा) बढाउने निर्णय गरेको छ। शिक्षा मन्त्रालयले नयाँ “विशेष छुट प्रणाली” अन्तर्गत तोहोकु विश्वविद्यालय, चुकुबा विश्वविद्यालय र हिरोशिमा विश्वविद्यालयलाई तोकिएको भर्ना सीमाभन्दा बढी अन्तर्राष्ट्रिय विद्यार्थी लिन अनुमति दिएको हो।

शिक्षा मन्त्रालयका अनुसार सन् २०२६ अप्रिलबाट लागू हुने यस व्यवस्थाअन्तर्गत ती ३ विश्वविद्यालयका जम्मा ११ संकाय (फ्याकल्टी) ले विदेशी विद्यार्थी संख्या बढाउन पाउनेछन् ।

यो प्रणाली गत वर्ष सुरु गरिएको भए पनि विशेष छुट प्रदान गरिएको यो पहिलो पटक हो।मन्त्रालयका अनुसार प्रमाणित (सर्टिफाइड) संकायहरूले आफ्नो अधिकतम भर्ना सीमाभन्दा करिब ५ प्रतिशतसम्म विदेशी विद्यार्थी संख्या बढाउन सक्नेछन्। सामान्य अवस्थामा तोकिएको कोटा नाघे विश्वविद्यालयले प्रशासनिक दण्ड (पेनाल्टी) सामना गर्नुपर्ने भएकाले अन्तर्राष्ट्रिय विद्यार्थी सक्रिय रूपमा भित्र्याउन कठिनाइ हुँदै आएको थियो।