टोकियो,जापान। “Give to Gain” भन्ने मूल नारासहित तथा “नारीको सम्मान राष्ट्रको अभिमान” भन्ने सन्देशका साथ ११६औँ अन्तर्राष्ट्रिय नारी दिवस जापानको टोकियोमा विशेष कार्यक्रमका साथ मनाइने भएको छ। कार्यक्रम आगामी मार्च ७ (शनिबार) दिउँसो १२:०० बजेदेखि मेगुरोस्थित २ Chome-४-३६, Meguro City, Tokyo १५३-००६३ मा आयोजना हुने आयोजकले जनाएको छ।

कार्यक्रमको आयोजना गैरआवासीय नेपाली संघ (एनआरएनए) राष्ट्रिय समन्वय परिषद् जापानले गरेको हो भने सह–आयोजकका रूपमा साहित्यिक चौतारी नेपाल जापान शाखा र नेपाली राजदूतावास टोकियो रहेका छन्। कार्यक्रममा नारी सम्मान, सशक्तीकरण, समान अधिकार तथा समाज निर्माणमा महिलाको भूमिकाबारे विचार–विमर्श, विशेष वक्तव्य तथा सांस्कृतिक प्रस्तुति समावेश गरिने जनाइएको छ।

जापानमा रहेका सम्पूर्ण नेपाली समुदायलाई कार्यक्रममा उपस्थित भई नारी सशक्तीकरणको सन्देश फैलाउन आयोजकले आग्रह गरेको छ। विदेशमा रहेर पनि आफ्नो पहिचान, संस्कार र सामाजिक जिम्मेवारीलाई मजबुत बनाउने उद्देश्यले यस्तो कार्यक्रमको आयोजना गरिएको जनाइएको छ।