टोकियो, जापान। जापानमा नेपाली पाठ्यक्रमअनुसार कक्षा १२ सम्म अध्ययन अध्यापन गराउँदै आएको एभरेष्ट इन्टरनेशनल स्कुलका छैटौँ ब्याचका विद्यार्थीहरू यस वर्ष (सन २०२६) को एसईई (SEE) परीक्षामा सहभागी भएका छन्। आजबाट सुरु भएको उक्त परीक्षामा विद्यालयका कुल २३ जना विद्यार्थीले भाग लिएका छन्।

विद्यालय प्रशासनका अनुसार यस वर्ष ९ जना छात्र र १४ जना छात्रा गरी जम्मा २३ जना विद्यार्थी सहभागी भएका हुन्। सन २०२१ देखि निरन्तर रूपमा विद्यालयका विद्यार्थीहरूले एसईई परीक्षा दिँदै आएका छन्।

प्रवासमा बसेर पनि नेपाली भाषा, संस्कार र शिक्षालाई निरन्तरता दिन पाउँदा अभिभावकहरू निकै खुसी र उत्साहित रहेको विद्यालयका प्रिन्सिपल विष्णु प्रसाद भट्टले बताउनुभयो। उहाँका अनुसार विद्यालयले शैक्षिक उपलब्धिसँगै अनुशासन, नैतिक शिक्षा र संस्कारमा विशेष ध्यान दिँदै आएको छ।

प्रिन्सिपल भट्टका अनुसार,कक्षा  ११ र १२ मा समेत नेपाली पाठ्यक्रमअनुसार पढाइ हुने एभरेष्ट इन्टरनेशनल स्कुलमा जापानका लागि नेपाली राजदूत  संरक्षकको रूपमा रहने प्रावधान सहित  नेपाल बाहिर सञ्चालन गरिएको एक मात्र नेपाली  विद्यालय हो। यसले जापानमा हुर्किँदै गरेका दोस्रो पुस्ताका नेपाली विद्यार्थीहरूलाई आफ्नै देशको पाठ्यक्रममा आधारित अन्तर्राष्ट्रिय शिक्षा प्रदान गर्दै आएको छ।

प्रवासमा रहेर पनि नेपाली पहिचान जोगाउँदै गुणस्तरीय शिक्षा प्रदान गर्ने लक्ष्यसहित विद्यालय अघि बढिरहेको जनाएको छ।