जापान । जापानमा बालबालिकाको सङ्ख्या निरन्तर घट्दै गएको देखिएको छ। सरकारी तथ्याङ्कअनुसार देशमा १५ वर्षभन्दा कम उमेरका बालबालिकाको सङ्ख्या १ करोड ३२ लाख ९० हजार पुगेको छ जुन अघिल्लो वर्षको तुलनामा करिब ३ लाख ५० हजारले कम हो। यो गिरावट लगातार ४५ औँ वर्षसम्म जारी रहेको आन्तरिक मामिला मन्त्रालयले जनाएको छ।

यो तथ्याङ्क अप्रिल १ को आधारमा सङ्कलन गरिएको हो र यो सङ्ख्या सन्१९५० यता अहिलेसम्मकै सबैभन्दा कम हो।  लिङ्गगत विवरणअनुसार ६८ लाख १० हजार बालक र ६४ लाख ८० हजार बालिका रहेका छन्।

उमेर समूहको विश्लेषण गर्दा उमेर घट्दै जाँदा बालबालिकाको सङ्ख्या पनि घट्दै गएको देखिन्छ। १२ देखि १४ वर्ष उमेर समूहमा करिब ३० लाख ९० हजार बालबालिका छन् भने ९ देखि ११ वर्ष समूहमा २९ लाख ६० हजार, ६ देखि ८ वर्षमा २६ लाख ८० हजार, ३ देखि ५ वर्षमा २४ लाख ३० हजार र ० देखि २ वर्ष उमेर समूहमा मात्र २१ लाख ३० हजार बालबालिका रहेका छन्।

जापानको कुल जनसङ्ख्यामा बालबालिकाको हिस्सा १०.८ प्रतिशतमा झरेको छ जुन अघिल्लो वर्षको तुलनामा ०.३ प्रतिशत बिन्दुले कम हो। यो अनुपात लगातार ५२ औँ वर्षसम्म घट्दै गएको देखिन्छ।

संयुक्त राष्ट्रसंघीय तथ्याङ्कअनुसार ४ करोडभन्दा बढी जनसङ्ख्या भएका देशमध्ये बालबालिकाको अनुपातमा जापान दोस्रो स्थानमा सबैभन्दा कम रहेको छ, जहाँ दक्षिण कोरिया पहिलो स्थानमा छ।