जापान । जापानको ओसाकामा एक युवतीको हत्या गरेको आरोपमा प्रहरीले २९ वर्षीय एक युवकलाई पक्राउ गरेको छ। पक्राउ पर्नेमा मिए प्रिफेक्चरको योक्काइची सिटी निवासी युया मोरी रहेका छन्।

प्रहरीका अनुसार शनिबार बिहान ओसाकाको चुओ वार्डस्थित नाम्बा क्षेत्रको एक होटल कोठामा २० वर्षको सुरुवाती उमेरकी युवती मृत अवस्थामा फेला परेकी थिइन्। घटनापछि प्रहरीले मोरीलाई डकैती तथा हत्या अभियोगमा पक्राउ गरेको हो।

स्थानीय सञ्चारमाध्यमका अनुसार मोरीले प्रहरीसमक्ष “मैले उनको घाँटी थिचेको हुँ, तर मार्ने उद्देश्य थिएन। मैले पैसा वा बहुमूल्य सामान पनि चोरेको होइन,” भन्दै आरोप आंशिक रूपमा अस्वीकार गरेका छन्।

प्रहरीले शुक्रबार राति मोरीले ती युवतीको हत्या गरी उनको ‘माइ नम्बर’ कार्डसहित केही सामान लुटेको आरोप लगाएको छ।

घटना त्यतिबेला सार्वजनिक भएको थियो जब शनिबार बिहान करिब ५ बजे एक पुरुष प्रहरी चौकीमा पुगेर “होटलमा एक महिलाको हत्या भएको हुन सक्छ” भन्दै जानकारी दिएका थिए। उनले आफ्नी एक महिला चिनजानले “एक पुरुषले आफूले कसैलाई मारेको बताएका छन्” भन्ने सुनेको बताएका थिए।

प्रहरी होटल पुगेपछि छैटौं तलाको कोठामा पूर्ण कपडा लगाएकी युवती ओछ्यानमा लडिरहेको अवस्थामा भेटिएकी थिइन्। युवतीको घाँटीमा निलडाम देखिएको र मृत्युको वास्तविक कारण पत्ता लगाउन शव परीक्षण गरिने प्रहरीले जनाएको छ।

घटनामा संलग्न व्यक्तिहरूको बयान तथा होटल वरपरका सुरक्षा क्यामेराको फुटेजका आधारमा प्रहरीले मोरीको खोजी सुरु गरेको थियो। पछि उनी क्योटो सिटीको अर्को होटलमा एक्लै रहेका बेला शनिबार राति पक्राउ परेका हुन्।

हत्या भएको होटल ओसाका मेट्रो नाम्बा स्टेशन नजिकैको मिनामी क्षेत्रमा पर्छ, जहाँ व्यापारिक भवन तथा रेस्टुरेन्टहरूको बाक्लो उपस्थिति रहेको छ।