टोकियो । स्याङ्जा समाज जापानले आपसी सद्भाव, भाइचारा र समुदायबीचको सहकार्यलाई अझ मजबुत बनाउने उद्देश्यसहित समर बीबीक्यू पार्टी आयोजना गर्ने भएको छ।

“स्याङ्जा समाज जापान राहत कोष सहयोगार्थ” भन्ने उद्देश्यका साथ आयोजना हुन लागेको कार्यक्रम मे १७ तारिख आइतबार चिबा प्रिफेक्चरको इचिकावा सिटीस्थित साकुराचुचुमी पार्कमा हुने आयोजकले जनाएको छ। कार्यक्रम बिहान १० बजेदेखि दिउँसो ४ बजेसम्म सञ्चालन हुनेछ।

कार्यक्रममा बीबीक्यूसहित संगीत, खाना, पेयपदार्थ तथा समुदायबीच भेटघाटको व्यवस्था रहने बताइएको छ। आयोजकका अनुसार, जापानमा रहेका नेपालीहरूबीच आपसी सम्बन्ध विस्तार गर्दै सुख–दुःखमा सहयोग गर्ने उद्देश्यले राहत कोषलाई बलियो बनाउन कार्यक्रम आयोजना गरिएको हो।

कार्यक्रमस्थल इचिकावा स्टेशनको दक्षिण निकासबाट करिब ५ मिनेटको दूरीमा रहेको जनाइएको छ। सहभागीहरूका लागि प्रवेश शुल्क पुरुषतर्फ ४ हजार येन र महिलातर्फ ३ हजार येन तोकिएको छ।

कार्यक्रमसम्बन्धी थप जानकारीका लागि दीपक न्यौपाने, सन्तोष हमाल, सागर न्यौपाने, वेद कार्की तथा मणि भट्टराईसँग सम्पर्क गर्न सकिने आयोजकले जनाएको छ। कार्यक्रम संयोजकका रूपमा दीपक न्यौपाने रहनुभएको छ।