टोकियो/जापान। जापान मौसम विज्ञान एजेन्सीले मे २८ मा “उच्च तापक्रमसम्बन्धी प्रारम्भिक मौसम सूचना” जारी गर्दै जुन ३ तिरदेखि देशका केही क्षेत्रमा यो समयका लागि १० वर्षमा एकपटक मात्र देखिने स्तरको उल्लेखनीय उच्च तापक्रम हुनसक्ने चेतावनी दिएको छ।

एजेन्सीका अनुसार तोकाइ, किन्की, चुगोकु, शिकोकु, क्युशु उत्तरी भाग र क्युशु दक्षिणी भागमा जुन ३ तिरदेखि अत्यधिक गर्मी हुने सम्भावना छ। यी क्षेत्रमा तातो हावा भित्रिने अवस्था बनेकाले आगामी २ सातासम्म तापक्रम सामान्यभन्दा धेरै उच्च रहने दिनहरू धेरै हुनसक्ने बताइएको छ।

तोकाइ क्षेत्रमा आइची, गिफु, मिए र शिजुओका पर्छन्। यस क्षेत्रमा ५ दिनको औसत तापक्रम सामान्यभन्दा १.५ डिग्री सेल्सियस वा त्यसभन्दा बढी भएमा “धेरै उच्च तापक्रम” मानिन्छ। मौसम एजेन्सीले कृषि बाली तथा पशुपालन व्यवस्थापनमा विशेष ध्यान दिन र गर्मीका कारण हुने स्वास्थ्य जोखिम, विशेषगरी हीटस्ट्रोकबाट जोगिन सतर्कता अपनाउन आग्रह गरेको छ।

किन्की क्षेत्रमा ओसाका, क्योटो, ह्योगो, नारा, वाकायामा र शिगा पर्छन्। यहाँ पनि जुन ३ तिरदेखि तापक्रम धेरै बढ्ने अनुमान गरिएको छ। यस क्षेत्रमा ५ दिनको औसत तापक्रम सामान्यभन्दा १.७ डिग्री सेल्सियस वा बढी भएमा “धेरै उच्च तापक्रम” मानिन्छ।

त्यस्तै चुगोकु क्षेत्रमा हिरोशिमा, ओकायामा, शिमाने र तोतोरी पर्छन्। यहाँ पनि तातो हावा भित्रिने भएकाले अत्यधिक उच्च तापक्रमका दिनहरू धेरै हुनसक्ने मौसम एजेन्सीले जनाएको छ।

मौसम एजेन्सीले यदि १ साताभित्र उच्च तापक्रमको सम्भावना थप स्पष्ट भएमा “उच्च तापक्रमसम्बन्धी मौसम  सूचना” जारी गरिने र भोलिपल्ट वा सोही दिन हीटस्ट्रोकको जोखिम अत्यन्तै उच्च हुने अवस्था देखिएमा “हीटस्ट्रोक चेतावनी अलर्ट” जारी गरिने जनाएको छ। नागरिकहरूलाई पानी पर्याप्त पिउन, घाममा लामो समय नबस्न, कोठाको तापक्रम व्यवस्थापन गर्न र बालबालिका तथा वृद्धवृद्धाको स्वास्थ्यमा विशेष ध्यान दिन आग्रह गरिएको छ।