टोकियो । जापानको राजधानी टोकियोमा आइतबार नेपाली भाषा, साहित्य र कविताको सुगन्धले भरिएको साहित्यिक कार्यक्रम सम्पन्न भएको छ। अनेसास जापान च्याप्टरले आयोजना गरेको ८३औँ नियमित साहित्य शृङ्खलामा हवाई च्याप्टरकी अध्यक्ष तथा कवि अमृता स्मृतिसँग विशेष अन्तर्क्रिया तथा खुला रचना वाचन कार्यक्रम सम्पन्न भएको हो।

टोकियोको सिनओकुबोस्थित रोयल गार्डेनको सभाहलमा आयोजित कार्यक्रम अनेसास जापानकी उपाध्यक्ष दीपा घिमिरेको अध्यक्षता तथा एनआरएनए जापानका अध्यक्ष सुभाष लामिछानेको प्रमुख आतिथ्यतामा सम्पन्न भएको थियो। कार्यक्रममा अनेसास जापानका संस्थापक अध्यक्ष डा. कुमार बस्नेत, बिओटी उपसभापति विष्णु प्रसाद घिमिरे तथा पूर्वअध्यक्षहरू दीप पाठक र अरुण पौडेल विशेष अतिथिका रूपमा सहभागी हुनुहुन्थ्यो।

कार्यसमिति सदस्य विश्वबन्धु भण्डारीको स्वागत मन्तव्यसंगै प्रारम्भ  भएको कार्यक्रमको  पहिलो सत्रमा कवि अमृता स्मृतिसँग विशेष अन्तर्क्रिया गरिएको थियो। कार्यक्रमको सहजीकरण अनेसास जापानका उपाध्यक्ष शरद पोखरेलले गर्नुभएको थियो। अन्तर्क्रियाका क्रममा कवि स्मृतिले आफ्ना करिब एक दर्जन कविता वाचन गर्दै समकालीन साहित्य, सिर्जनात्मक यात्रा र नेपाली भाषाको वर्तमान अवस्थाबारे धारणा राख्नुभएको थियो।

दोस्रो सत्रमा खुला रचना वाचन कार्यक्रम आयोजना गरिएको थियो। उक्त सत्रमा सहभागी साहित्यप्रेमी तथा स्रष्टाहरूले आफ्ना कविता, गजल तथा अन्य सिर्जना प्रस्तुत गरेका थिए। दीप पाठक, अरुण पौडेल, सुजन बैरागी, सुजता शर्मा, मीनराज बास्तोला, हेमन्त गिरी, सविना रेग्मी, लक्ष्मण भन्तना शिरीष,संगिता कुँवर,लक्ष्मी पौडेल,विश्वबन्धु भण्डारी,यमलाल कँडेल,मनिषा सुवेदी,हरि बिनोद अधिकारी  लगायतले  रचना वाचन गर्नुभएको थियो।

भगवती क्षेत्रीको संयोजकत्व तथा मनोज मौसम केसीको उद्घोषणमा सम्पन्न कार्यक्रममा टोकियो आसपासका साहित्यप्रेमीहरूको सहभागिता रहेको थियो।