टोकियो, जापान। जापानमा अत्यधिक गर्मीका कारण हीटस्ट्रोकका बिरामीको संख्या तीव्र रूपमा बढेको छ। जापानको आन्तरिक मामिला तथा सञ्चार मन्त्रालयअन्तर्गतको अग्नि तथा विपद् व्यवस्थापन एजेन्सीका अनुसार जुलाई १३ देखि १९ सम्मको एक सातामा देशभर १० हजार ८५७ जना हीटस्ट्रोकका कारण अस्पताल पुर्‍याइएका छन्।

यो संख्या यस वर्ष पहिलो पटक १० हजार नाघेको हो। अघिल्लो साताको ४ हजार ५८० जनाको तुलनामा यो दुई गुणाभन्दा बढी वृद्धि हो। साथै, जुन महिनाभरि अस्पताल भर्ना गरिएका ४ हजार ६४ जनाको कुल संख्याभन्दा पनि धेरै हो।

एक साताको अवधिमा १४ जनाको मृत्यु भएको छ। यस्तै, ४ हजार ३८२ जना गम्भीर वा मध्यम अवस्थाका कारण अस्पतालमा भर्ना भएका छन् भने ६ हजार ३६१ जना सामान्य उपचारपछि घर फर्किएका छन्।

क्षेत्रगतरूपमा ओसाकामा सबैभन्दा धेरै १ हजार ४१ जना, त्यसपछि आइचीमा ७९७ जना र टोकियोमा ७८३ जना अस्पताल पुर्‍याइएका छन्।

उमेरका आधारमा हेर्दा ६५ वर्ष वा सोभन्दा माथिका ६ हजार ७३४ जना प्रभावित भएका छन्, जुन कुल संख्याको आधाभन्दा बढी हो। त्यसपछि १८ देखि ६५ वर्ष उमेर समूहका ३ हजार २७० जना, ७ देखि १८ वर्षका ७९८ जना र ७ वर्षभन्दा कम उमेरका ५५ जना रहेका छन्।

घटनास्थलका आधारमा सबैभन्दा धेरै घरभित्रै ४ हजार ५२३ जना प्रभावित भएका छन्। त्यसपछि सडकमा २ हजार ३२६ जना तथा खेलमैदान, पार्किङ क्षेत्र, रेल स्टेशनका प्लेटफर्मलगायत बाहिरी स्थानमा १ हजार ९५ जना प्रभावित भएका छन्।

अग्नि तथा विपद् व्यवस्थापन एजेन्सीले अहिलेको अत्यधिक गर्मीलाई “विपद्को अवस्था” सरह रहेको भन्दै प्यास लाग्नुअघि नै बारम्बार पानी पिउन, एयर कन्डिसनर उचित रूपमा प्रयोग गर्न, बाहिर काम गर्दा नियमित विश्राम लिन र गर्मीबाट बच्ने सबै सावधानी अपनाउन सर्वसाधारणलाई आग्रह गरेको छ।