टोकियो,जापान। गायक सूर्य खड्का र गायिका देवी घर्तीको सुमधुर स्वरमा सजिएको नयाँ तीज गीत ‘पिर नल्यु आमाले’ (पिर नल्यु बाबाले) को म्युजिक भिडियो सार्वजनिक गरिएको छ।

परदेशमा रहेका छोराछोरीले आफ्ना आमाबुबालाई चिन्ता नगर्न आग्रह गर्दै आफूहरू सुखी रहेको भाव व्यक्त गरिएको यस गीतले नेपाली परिवारको माया, जिम्मेवारी र भावनात्मक सम्बन्धलाई प्रभावकारी रूपमा प्रस्तुत गरेको छ।

भिडियोमा स्मारिका ढकाल र सूर्य खड्काले श्रीमान्–श्रीमतीको भूमिकामा अभिनय गरेका छन्। उनीहरूले वृद्ध आमाबुबाको सेवा गर्ने, सम्मान गर्ने तथा उनीहरूबाट आशीर्वाद ग्रहण गर्ने दृश्यहरूलाई निकै मार्मिक ढंगले प्रस्तुत गरेका छन्। साथै, दशैं–तिहारमा टीका र जमरा ग्रहण गर्ने नेपाली मौलिक संस्कारलाई पनि आकर्षक रूपमा समेटिएको छ।

गीतमा सूर्य खड्काकै शब्द तथा संगीत रहेको छ। म्युजिक भिडियोको निर्देशन दुर्गा पौडेलले गरेका हुन् भने एड्भेन्चर इन्टरटेन्मेन्टले निर्माण गरेको हो। भिडियोमा स्मारिका ढकालको अभिनय र नृत्यले थप आकर्षण थपेको छ।

पारिवारिक सम्बन्ध, आमाबुबाप्रतिको सम्मान र नेपाली मौलिक संस्कृतिलाई केन्द्रमा राखेर तयार गरिएको ‘पिर नल्यु आमाले’ ले लोकदोहोरी संगीतप्रेमी दर्शकमाझ राम्रो प्रतिक्रिया पाउने अपेक्षा गरिएको छ।