टोकियो। जापान भ्रमणमा आउने विदेशी पर्यटकले यसअघि अनुमान गरिएभन्दा निकै बढी चामल(भात)खाने गरेको नयाँ सरकारी तथ्यांकले देखाएको छ।

जापानको कृषि, वन तथा मत्स्य मन्त्रालयले जुलाई २७ मा सार्वजनिक गरेको आर्थिक वर्ष २०२५ को अध्ययनअनुसार, विदेशी पर्यटकले जापान बसाइका क्रममा प्रतिदिन औसत ५७० ग्राम पकाएको भात खाने गरेका छन्। यो करिब ४ वटा सामान्य आकारका भातका कचौरा बराबर हो।

यसअघि मन्त्रालयले विदेशी पर्यटकले दैनिक करिब ३५० ग्राम (झण्डै २.५ कचौरा) भात खाने अनुमान गरेको थियो। नयाँ तथ्यांकले त्यो अनुमानभन्दा उल्लेख्य रूपमा बढी रहेको देखाएको हो।

अध्ययनका लागि १४ देश तथा क्षेत्रका पर्यटकसँग गरिएको प्रश्नावली सर्वेक्षणको आधारमा तथ्यांक तयार गरिएको मन्त्रालयले जनाएको छ।

देशअनुसार हेर्दा सबैभन्दा धेरै भात खानेमा भियतनामका पर्यटक रहेका छन्, जसले औसत ७१८ ग्राम भात खाने गरेका छन्। त्यसपछि इन्डोनेसिया (७१४ ग्राम), फिलिपिन्स (६९५ ग्राम) र थाइल्यान्ड (६२९ ग्राम) रहेका छन्।

यस्तै, अमेरिकाका पर्यटकले औसत ५६५ ग्राम तथा चीनका पर्यटकले ५४६ ग्राम भात खाने गरेका छन्। सर्वेक्षणमा समावेश समूहहरूमध्ये सबैभन्दा कम भात खाने हङकङका पर्यटक भए पनि उनीहरूले पनि औसत ४६८ ग्राम भात खाने गरेका छन्।

तुलनात्मक रूपमा, जापानमा एक व्यक्तिले दैनिक औसत ३३० देखि ३४० ग्राम पकाएको भात खाने गरेको मानिन्छ। अर्थात्, विदेशी पर्यटकले जापानी नागरिकको तुलनामा करिब ७० प्रतिशत बढी भात खाने गरेको तथ्यांकले देखाएको छ।

मन्त्रालयका अनुसार विदेशी पर्यटकमा सुशी मात्र होइन, ओनिगिरी (जापानी राइस बल) पनि अत्यधिक लोकप्रिय बन्दै गएको छ। धेरै पर्यटकले बिहान, दिउँसो र बेलुका गरी दिनभरि नै विभिन्न परिकारमार्फत भात सेवन गर्ने गरेकाले औसत खपत उल्लेख्य रूपमा बढेको हो।