टोकियो, जापान। नेपालका विभिन्न क्षेत्रमा आएको बाढी तथा पहिरोबाट प्रभावित परिवारलाई राहत पुर्‍याउने उद्देश्यले धादिङ समाज जापानले ४८ घण्टे आर्थिक सहयोग अभियान सञ्चालन गर्ने भएको छ। अभियानको सुरुवात गर्दै समाजले संस्थाको तर्फबाट ५ लाख येन सहयोग गर्ने घोषणा गरेको छ।

धादिङ समाज जापानका महासचिव सुशान्त बानियाँका अनुसार रसुवा, नुवाकोट र धादिङलगायत बाढी तथा पहिरो प्रभावित क्षेत्रका पीडितलाई सहयोग पुर्‍याउने उद्देश्यले तत्काल आर्थिक संकलन अभियान सञ्चालन गर्ने निर्णय गरिएको हो।

विपत्तिका कारण प्रभावित परिवारहरू कठिन परिस्थितिमा रहेको उल्लेख गर्दै समाजले जापानमा रहेका सम्पूर्ण नेपाली दाजुभाइ तथा दिदीबहिनीलाई आ–आफ्नो क्षमताअनुसार अभियानमा सहभागी हुन अपिल गरेको छ।

“सानो सहयोगले पनि विपत्तिमा परेका परिवारका लागि ठूलो अर्थ राख्न सक्छ,” समाजले जारी गरेको अपिलमा भनिएको छ। संकलित सहयोग पीडित परिवारसम्म राहतका रूपमा पुर्‍याउने समाजले जनाएको छ।

आर्थिक सहयोग गर्न चाहने व्यक्तिले धादिङ समाज जापानको खाता नम्बर १००६०–४९९४९८९१ मा रकम जम्मा गर्न सक्नेछन्। खाताको नाम ダハディン　サマズ　ジャパン रहेको छ।

समाजले विपत्तिको समयमा एकताबद्ध भएर पीडितको दुःखमा साथ दिन जापानवासी नेपाली समुदायलाई आग्रह गर्दै ४८ घण्टे अभियानमा सक्रिय सहभागिता जनाउन अपिल गरेको छ।