चितवन । चितवनमा ट्रकको ठक्करबाट पत्रकार प्रवीण पौडेलसहित दुईजनाको मृत्यु भएको छ । पूर्वी चितवनको टाँडीमा शुक्रबार ट्रकले ठक्कर दिँदा पत्रकार प्रवीण पौडेलको मृत्यु भएको प्रहरीले जनाएको छ ।रत्ननगरस्थित निपनी चोकबाट सौराहा जाँदै गरेका पौडेल सवार बा १ प ९२१ नम्बरको स्कुटरलाई ना २ ख २१६६ नम्बरको ट्रकले ठक्कर दिँदा घाइते भएका पौडेलको उपचारको क्रममा भरतपुर अस्पतालमा मृत्यु भएको चितवन प्रहरीले जनाएको छ ।

पौडेलले एपी वान टेलिभिजनका क्यामरा पर्सन रुपमा काम गर्दै आएका थिए । उनको शव भरतपुर अस्पतालको शव गृहमा राखिएको छ । ठक्कर दिने ट्रक र चालक इलाका प्रहरी कार्यालय टाँडीको नियन्त्रणमा रहेको प्रहरीले जनाएको छ ।

यसैबीच, भरतपुरको वाइपास रोडमा ट्रकले ठक्कर दिँदा साइकलयात्री बारा गढिमाई नगरपालिका ३ मजुरीका १८ वर्षका श्याम चौधरीको मृत्यु भएको जिल्ला प्रहरी कार्यालय चितवनले जनाएको छ ।

तनहुँको आबुखैरेनीबाट बीरगञ्ज जाँदै गरेको ना ७ ख १३९४ नम्बरको ट्रकले भरतपुर बाइपास सडकको मालपोत चोक नजिकै भित्री सडकबाट निस्किएको साइकललाई ठक्कर दिँदा चौधरीको मृत्यु भएको हो । ठक्कर दिने ट्रक र चालक प्रहरी नियन्त्रणमा छन् ।