टोकियो,जापान। अमेरिकी पत्रिका टाइमले सार्वजनिक गरेको सन् २०२६ को ‘विश्वका सबैभन्दा प्रभावशाली १०० व्यक्तिहरू’ को सूचीमा जापानबाट प्रधानमन्त्री सानाए ताकाइची चयन हुनुभएको छ।

टाइमले अप्रिल १५ मा उक्त सूची सार्वजनिक गर्दै राजनीति, कला, खेलकुदलगायत विभिन्न क्षेत्रका प्रभावशाली व्यक्तिहरूलाई समेटेको जनाएको छ।

यस सन्दर्भमा टोकियोकी गभर्नर युरिको कोइके ले प्रतिक्रिया दिँदै जापानको राजनीतिमा पहिले “फलामको छानो” जस्तो अवरोध रहेको उल्लेख गर्नुभयो। उहाँका अनुसार महिलाहरूलाई देशको उच्च निर्णय प्रक्रियामा पुग्न अवरोध हुने गरेको थियो, तर ताकाइचीले त्यो अवरोध तोड्न सफल भएको बताउनुभयो।

यस वर्षको सूचीमा अमेरिकी राष्ट्रपति डोनाल्ड ट्रम्प, चिनियाँ राष्ट्रपति सी जिनपिङ, तथा “मिडल पावर” देशहरूको सहकार्यको पक्षमा आवाज उठाएका क्यानडाका प्रधानमन्त्री मार्क कार्नी समेत समावेश छन्।

त्यसैगरी, हालै रोमन क्याथोलिक चर्चका प्रमुख नियुक्त भएका पोप लियो चौधौँ, मिलानो–कोर्तिना ओलम्पिक अन्तर्गत फिगर स्केटिङ महिला एकलतर्फ स्वर्ण पदक जितेकी अमेरिकी खेलाडी एलिसा लिउ पनि सूचीमा परेका छन्।

टाइम पत्रिकाले हरेक वर्ष विश्वभरका प्रभावशाली व्यक्तिहरूलाई समेट्दै यस्तो सूची सार्वजनिक गर्ने गर्दछ। गत वर्ष भने जापानी अभिनेता हिरोयुकी सानादा समेत उक्त सूचीमा परेका थिए।