काठमाडौं, १४ चैत । प्रदेश तथा प्रतिनिधिसभा निर्वाचन पर्यवेक्षणपछि युरोपियन युनियन (ईयू) ले सार्वजनिक गरेको प्रतिवेदनको चौतर्फी आलोचना भइरहेका बेला राष्ट्रिय जनता पार्टी र फोरमले भने यसको समर्थन गरेका छन् । राष्ट्रियसभा बैठकमा मंगलबार धारणा राख्दै फोरम र राजपाका सांसद् ईयूको पक्षमा उभिएका हुन् ।
राजपा नेपालका वृशेषचन्द्र लालले युरोपेली संघको पर्यवेक्षणले खास आर्यलाई आरक्षणबाट हटाउन दिएको सुझाव जायज भएको बताएका छन् ।

‘लोकतान्त्रिक अभ्यास र मानव अधिकारको स्थितिबारे अध्ययन गरेर सुझाव दिनु हस्तक्षेप हो ? हो भने संविधानको समर्थन गर्नु पनि हस्तक्षेप नै हो’, लालले बैठकमा व्यक्त गरेको नयाँ पत्रिका दैनिकमा समाचार छ । संघीय समाजवादीकी प्रमिला कुमारीले ईयूको सुझाव सकारात्मक रहेकाले गम्भीरतापूर्वक लिनुपर्ने बताइन् ।