रौतहट, १६ चैत । खुला दिसामुक्त क्षेत्र घोषणा गर्ने देखासिकी देशभर छ । कतिसम्म भने शौचालयविहीन बस्तीसमेत खुला दिसामुक्त घोषणा भएका छन् ।
रौतहटका स्थानीय तहलाई खुला दिसामुक्त क्षेत्र घोषणा गर्न हतारो छ । तहलाई खुला दिसामुक्त घोषणा गर्न हतारो भए पनि घोषित धेरै बस्तीमा शौचालय बनिसकेका छैनन् । खानेपानी मन्त्री विना मगरले बुधबार मौलापुर नगरपालिकालाई खुला दिसामुक्त क्षेत्र घोषणा गरिन् । तर सोही नगरपालिकाका सबै घरमा शौचालय नभएको आजको अन्नपूर्ण पोष्ट दैनिकमा समाचार छ । नगर क्षेत्रका सडक किनार, सार्वजनिक स्थल तथा खेतमा शौच गरिएको भेटिएको छ ।

अन्नपूर्ण खबरको अगाडि लेख्छ–शौचालय निर्माणका लागि दिइएका सामग्री घर वरपर अलपत्र अवस्थामा भेटिएका छन् । बुधबार खुला दिसामुक्त क्षेत्र घोषणा गर्न छनोट गरिएको कार्यक्रमस्थल वरपर खुला रुपमा गरिएको दिसाले दुर्गन्ध फैलिएको थियो । कतिपय सहभागी शौच कुल्चिएरै कार्यक्रमस्थल पुग्न बाध्य भए ।’