काठमाडौं, ३ असार । के तपाईहरुले आकासे पानी संकलन गरेर पानीको गर्जो टार्दै आउनु भएको छ ? त्यसो हो भने सावधान अब त्यस्तो कहिल्यै नगर्नुहोला ? कारण पछिल्लो केही दिन यता परेको हिले पानीको प्रयोगले झाडाबान्ता, टाइफाइड, जन्डिसजन्य महामारीको साथै छाला र आँखाको समस्या निम्ताउने खतरा पनि हुन्छ ।
शुक्रबार रातिदेखि काठमाडौं उपत्यकासहित देशका विभिन्न भागमा परेको हिलोसहितको पानी भने निकै दूषित छ । जनस्वास्थ्य विज्ञ डा. रवीन्द्र पाण्डे दूषित वर्षा भइरहेकाले केही दिन आकासे पानी प्रयोग नगर्न सुझाव दिन्छन् । ‘वायुमण्डलमा धूलो सघन रहँदा यस्तो वर्षामा विभिन्न हानिकारक पदार्थ, रासायनिक पदार्थ, जीवाणु छन् ।’ डा. पाण्डेले भने, ‘जसले झाडावान्ता, टाईफाईड, जन्डिसजन्य समस्या, छालाको एलर्जी, आँखाको एलर्जी तथा अन्य महामारी फैलिने खतरा छ ।’

विज्ञहरुको अनुसार दूषित वर्षा भइरहेकाले भिज्नु पनि हानिकारक हुने बताएको छ । विज्ञहरुले पानीमा नभिज्न र काठमाडौंको धुलोबाट समेत सचेत रहन सुझाएका छन् । काठमाडौंको वायुमण्डलमा प्रदूषण बढेकाले बालबालिका, वृद्धवृद्धा, बिरामी तथा श्वासप्रश्वासका बिरामीले विशेष ख्याल गर्नुपर्ने जनस्वास्थ्य विज्ञहरुको सुझाव छ ।

मौसमविद सुभास रिमालका अनुसार भारतका विभिन्न स्थानमा केहि दिनयता आएको हावाहुरीले राजस्थानको मरुभूमीको बालुवा उडायो र त्यो बालुवा उच्च वायु हुँदै नेपालको आकाशसम्म फैलियो । पानी परेपछि धूलो पनि मिसियो, जसले गर्दा पानी धमिलो भयो ।

यस्तो धमिलो वर्षा अझै केही दिन जारी रहने मौसम विज्ञान विभाग मौसम पूर्वानुमान महाशाखाले जनाएको छ ।