मस्को १७ असोज । साविकको विजेता स्पेनिस क्लब रियल मड्रिड च्याम्पियन्स लिग अन्तर्गतको समूह चरणको दोस्रो खेलमा रुसी क्लब सिएसकेए मस्कोसँग १–० ले स्तब्ध बनेको हो ।

मस्कोको घरेलु मैदान लुज्निकी स्टेडियममा मंगलबार राति भएको खेलमा रियाललाई स्तब्ध बनाउन निकोला भ्लासिकले दोस्रो मिनेटमा गरेको गोल नै निर्णायक बनेको थियो । मुख्य खेलाडीहरु ग्यारेथ बेल, मार्सेलो र कप्तान सर्जियो रामोसविनै मैदान उत्रिएको रियल खेलको दोस्रो मिनेटमा नै पछि परेको थियो ।

रियलका गोलरक्षक केलर नाभास र डिफेन्डर राफेल भरानेबीच तालमेल मिन्ल नसके फाइदा उठाउदै मस्कोका निकोला भ्लासिकले डि–बक्सभित्रबाट गरेको भली प्रहार गोलमा परिणत भएको थियो ।

खेलमा १–० ले पछि परेपछि रियलले आक्रमक फुटबल खेल्दै गोलको लागि निरन्तर आक्रमण बुनेपनि गोल गर्न सफल हुन सकेन र मस्कोसँग १–० ले स्तब्ध बन्न पुग्यो ।
रियलमाथिको महत्वपूर्ण जितसँगै मस्को दुई खेलबाट ४ अंक जोडेर समूह ‘जी’ को शीर्ष स्थानमा उक्लिएको छ । मस्कोसँगको हारपछि रियल ३ अंकसहति तालिकामा दोस्रो स्थानमा झरेको छ ।
मंगबार राति नै भएको अर्काे खेलमा इटालियन क्लब रोमाले भिक्टोरिया प्जेजेनमाथि ५–० को फराकिलो जित दर्ता ग¥यो । रोमाको जितमा इडेन जेकोको ह्याट्रिक पुरा गरे । सेन्जिज अन्डर र जस्टिन क्लुइभर्टले समान १ गोल गरे ।