फाल्गुन ३, २०७३-

महानगरीय अपराध महाशाखाको साइबर पिलरमा उजुरी लिएर आएकी एउटी २१ वर्षीया युवतीको समस्या बढो अनौठोको थियो ।

अपरिचित युवकले फोनमार्फत बारम्बार यौनसम्बन्धको प्रस्ताव राख्ने र तारन्तार अश्लिल म्यासेजहरु पठाउँदा उनी हैरानमात्रै होइन बैचन नै बनेकी थिइन् । महाशाखाले तुरुन्तै मोबाइल प्रयोगकर्ता सागर धिताललाई ललितपुरको ग्वार्कोबाट पक्राउ गर्‍यो ।

सागरले कहिल्यै नचिनेकी केटीको फोन नम्बर एउटा फेसबुक अकाउन्टबाट पत्ता लगाएका बताए । त्यसपछि प्रहरीको अनुसन्धानको सुइ अश्लिल नाम दिएर खोलिएको फेसबुक अकाउन्टतिर सोझियो ।

प्रहरी अनुसन्धानपछि खुल्यो उक्त अश्लिल अकाउन्ट दुई वर्ष अमेरिका बसेर फर्केपछि एक निजी कम्पनीमा अकाउन्टेन्टको काम गर्ने सुरज बस्नेतले चलाइरहेका रहेछन् । अनौठो त के भने, सेक्स धन्दाको जन्जाल फैलाउनकै लागि बस्नेतले उक्त फेसबुक अकाउन्ट चलाएको देखियो ।

जहाँ विभिन्न २३ युवतीका टेलफोन नम्बर सार्वजनिक गरिएको छ । बस्नेतले नाम र फोन नम्बर सार्वजनकि गरेको उक्त फेसबुक अकाउन्टलाई यौन सम्बन्ध राख्नका निम्ति फोन गर्न सकिने भन्दै सूचना छाडने गरेका थिए । बस्नेत आफैं पनि कैयन युवतीहरुसँग फोन वा फेसबुकमार्फत सम्पर्कमा पुग्ने, उनीहरुलाई यौन सम्बन्धका निम्ति बाध्य बनाउन धम्काउने र बाध्य बनाउने गरेको अनुसन्धानले देखाएको प्रहरीले बतायो ।

महाशाखाका साइबर पिलर सम्हालिरहेका डिएसपी पशुपति रायले फेसबुकमार्फत यौन धन्दाको सञ्जाल चलाउने यस्ता अभ्यास नौलो भएको बताए । उनले यस्तो प्रवृत्ति खतरनाक हुने बताउँदै अश्लिल सामाग्री राख्ने अन्य केही फेसबुक पेज र अकाउन्टबारे पनि अध्ययन गरिरहेको बताए ।

पक्राउ परेका बस्नेतले अमेरिकामा बस्दा यस्तो कार्य गैरकानूनी नभएकाले नै त्यस्तो अकाउन्ट चलाइरहेको बताए । तर प्रहरीले भने उनले यौन सञ्जाल बढाउँदै धेरै भन्दा धेरैलाई फेसबुकमा समेटन त्यस्तो गरेको हुनसक्ने बतायो ।

प्रहरीले धिताललाई सार्वजनिक अपराध ऐन अन्तर्गत मुद्धा चलाएको छ भने बस्नेतलाई विद्युतीय कारोबार ऐन २०६३ अन्तर्गत मुद्धा चलाइएको छ