एजेन्सी – अन्तर्राष्ट्रिय मैत्रीपुर्ण खेलमा ब्राजिलले होन्डुरसमाथि शानदार जित हात पारेको छ । पोर्टाे एलेग्रीमा आइतबार राति भएको खेलमा घरेलु टोली ब्राजिलले १० खेलाडीमा समेटिएको होन्डुरसलाई ७–० को भारी अन्तरले पराजित गरेको हो ।

ब्राजिलको शानदार र फराकिलो जितमा गाब्रियल जेससले २ गोल गरे । थियागो सिल्भा, फिलिपे कौटिन्हो, डेभिड नेरेस, रोबर्टाे फिर्मिनो र रिचालीसनले गोल गरे ।

शुरुवातदेखि नै आक्रमक खेल खेलेको ब्राजिलले खेलको छैटौ मिनेटमा जेससको गोलबाट अग्रता बनाएको थियो । १३औं मिनेटमा थियागो सिल्भाले गोल गर्दै ब्राजिलको अग्रता दोब्बर बनायो ।

२९औं मिनेटमा होन्डुरस १० खेलाडीमा समेटियो । रोमेल कुइओटो रातो कार्ड खादै मैदानबाट बाहिरिएको थियो । जसको फाइदा ब्राजिले उठायो । ३७औ मिनेटमा फिलिपे कौटिन्होले पेनाल्टीमा गोल गरेपछि ब्राजिलले पहिलो हाफमा ३–० को अग्रता लिएको थियो ।

४७औं मिनेटमा जेससले व्यक्तिगत दोस्रो गोल गरेपछि ब्राजिल खेलमा ४–० को अग्रता लियो । ५६औं मिनेटमा डेभिड नेरेसले गोल गरे । ६५औं मिनेटमा रोवर्टाे फिर्मिनोले गोल गरेपछि ब्राजिल खेलमा ६–० ले अघि बढ्यो । ७०औं मिनेटमा रिचार्लीसनले गोल गर्दै ब्राजिललाई ७–० को फराकिलो जित दिलाए ।

ब्राजिल घरेलु मैदानमा आयोजना हुने कोपा अमेरिका कपको तयारीमा छ । ब्राजिल रहेको समूह ‘ए’ मा बोलिभिया, भेनेजुएला र पेरु रहेको छ । ब्राजिलले १५ जुनमा बोलिभियासँग खेल्दै कोपा अमेरिका कपको शुरुवात गर्दैछ । होन्डुरस कोन्काफ गोल्डकपको तयारीमा छ ।

यस्तै अन्तर्राष्ट्रिय मैत्रीपुर्ण खेलमा कोलम्वियाले १० खेलाडीमा समेटिएको घरेलु टोली पेरुलाई ३–० ले पराजित गरेको छ । कोलम्वियाको सहज जितमा मेटअस युरिवीले दुई तथा डुभान जापाटाले एक गोल थपे ।

अर्काे मैत्रीपुर्ण खेलमा मेक्सिकोले इक्वेडरलाई ३–२ को प्रतिस्पर्धात्मक जित निकाल्यो । मेक्सिकोका लुइस रोड्रिग्वेज, लुइस मोन्टेस र जोनाथान डोस सान्तोषले गोल गरे । इक्वेडरका इडवार प्रिसियाडो र एन्जेल मिनाले गोल फर्काए । यस्तै पाराग्वेले ग्वाटेमालालाई २–१ ले हरायो ।