काठमाडौं । विश्वभर कोराना भाइरस ९कोभिड–१९० बाट आइतबार ४ हजार ७ सय व्यक्तिले ज्यान गुमाएका छन् । आइतबार सबैभन्दा बढी अमेरिकामा ११ सय ६५ व्यक्तिको मृत्यु भएको छ । योसँगै त्यहाँ कोरोनाबाट ज्यान गुमाउनेको संख्या ९ हजार ६ सय नाघेको छ ।

अमेरिकामा २४ घण्टामा २५ हजार नयाँ संक्रमित थपिएका छन् । योसँगै त्यहाँ संक्रमितको संख्या ३ लाख ३६ हजार नाघेको छ । स्पेनमा १ लाख ३१ हजार बढी व्यक्ति संक्रमित भइसकेका छन् । जसमध्ये १२ हजार ६ सयको ज्यान गइसकेको छ । स्पेनमा आइतबार ६९४ संक्रतिमको मृत्यु भएको छ ।

इटालीमा समृतकको संख्या १५ हजार ८ सय नाघेको छ । त्यहाँ १ लाख २८ हजारमध्ये २१ हजार संक्रमित उपचारपछि घर फर्किएका छन् ।जर्मनीमा कोरोना संक्रमितको संख्या एक लाख नाघेको छ । त्यहाँ १५ सय व्यक्तिको ज्यान गएको छ । बेलायतमा संक्रमितको संख्या ४७ हजार नाघ्दा ४ हजार ९ सय बढीको ज्यान गइसकेको छ । त्यहाँ पछिल्लो २४ घण्टामा मात्र ६२१ जनाले ज्यान गुमाए ।

चीनमा आइतबार ३० नयाँ संक्रमित थपिँदा ३ जनाको मृत्यु भएको छ । कोरोनाको उद्गम देश चीनमा कूल संक्रमितको संख्या साढे ८१ हजार छ । त्यहाँ ३३ सय २९ संक्रमितको ज्यान गएको छ ।

२०८ देशमा फैलिसकेको कोरोनाबाट पछिल्लो २४ घण्टामा ७१ हजार ४ सय नयाँ संक्रमित थपिएका छन् । योसँगै विश्वभर कूल संक्रमितको संख्या १२ लाख ७३ हजार नाघेको छ । यस्तै, २ लाख ६२ हजार संक्रमित उपचारपछि घर फर्किसकेका छन् ।