डोटी । डोटीको जोरायल गाउँपालिका– ४ देउथलामा युवतीको गोली हानी हत्या भएको छ । आइतबार बेलुकी करिब ५ बजेतिर २० वर्षीया अनिता वनको गोली हानी हत्या भएको इलाका प्रहरी कार्यालय जोरायलका इन्चार्ज प्रहरी नायव निरीक्षक महेन्द्र थापाले जानकारी दिए ।

मृतकको अनिताको छातीमा गोली लागेको छ । घटनामा भरुवा बन्दुकको प्रयोग भएको प्रहरीले जनाएको छ । घटनामा संलग्न भएको आशंकामा प्रहरीले युवतीका श्रीमान खडक वनलाई नियन्त्रणमा लिएर अनुसन्धान गरिरहेको छ ।

घटना हुँदा मृतक अनिता र श्रीमान् खडक मात्रै घरमा भएको प्रहरीले बताएको छ । खड्कले भने आफूले गोली नहानेको बयान दिएको इन्चार्ज थापाले बताए । उनले आफू घरको तल्लो तलामा रहेको बेला एक्कासी बन्दुक पड्किएको आवाज आएको र त्यसपछि माथिल्लो कोठामा जाँदा श्रीमती ढलेको देखेको बयान दिएका छन् ।

घरमा दुईजना मात्रै भएको समयमा घटना भएकोले श्रीमानले हत्या गरेको हुन प्रहरीको आशंका छ । घरमा राखिएको भरुवा बन्दुकसमेत अवैध रहेको प्रहरीको भनाइ छ । यता जिल्ला प्रहरी कार्यालय डोटीका प्रमुख, एसपी दिलीपसिंह देउवाले पनि घटनाको विष्तृत अनुसन्धान भइरहेको बताएका छन् । घटना कसरी भयो, कसले गर्‍यो भन्ने विषयमा तत्काल भन्न नसकिने उनले बताए ।

डडेलधुराको भागेश्वर गाउँपालिका–५ बगरकोट सिराडी माइती घर भएकी अनिता र खडकको प्रेम सम्बन्धपछि गत फागुन २९ गते विवाह भएको थियो ।