एजेन्सी । सोसल मिडिया प्लेटफर्म ट्वीटरमार्फत् सम्पर्क गरेपछि ९ जनाको हत्या गर्ने एक व्यक्तिलाई जापानमा मृत्युदण्डको सजाय दिइएको छ । यो हाई–प्रोफाइल घटनाले पूरा जापानलाई हल्लाएको छ ।

‘ट्वीटर किलर’ नामबाट चर्चित टाकाहिरो शिराइसीलाई सन् २०१७ मा पक्राउ गरिएको थियो । त्यतिबेला उनको फ्ल्याटबाट मानव शरीरको अंग बरामद गरिएको थियो । सोधपुछमा ३० वर्षका टाकाहिरोले आफूले हत्या गरेको र पीडितको अंग क्षत–विक्षत गरिएको स्विकार गरे । यीमध्ये धेरैजसो महिला थिए जसलाई उनले सोसल मिडिया प्लेटफर्मममा भेटेका थिए ।

सिरियल किलिङको यो घटना सार्वजनिक भएपछि अनलाइन प्लेटफर्ममा ‘आत्महत्या’ बारे कसरी कुरा गर्ने भनेर बहस चर्किएको थियो । स्थानीय मिडियाका अनुसार मंगलबार चार सय बढी मानिसहरुले यो निर्णय सुने जबकि १६ जना मानिसहरुलाई मात्र बस्ने सुविधा थियो ।

जापानमा मृत्युदण्डको विषयमा मानिसहरुले भारी समर्थन पाएको छ र जापान विकसित देशमध्ये त्यस्तो एक देश हो जहाँ मृत्यु दण्डको सजाय कायम राखिएको छ ।

कसरी गर्दथे पीडितको खोजी ?

टाकाहिरो ट्वीटरमार्फत् यस्ता महिलालाई आफ्नो घर बोलाउँथे जो आफ्नो जीवन समाप्त गर्न चाहन्थे । उनी महिलालाई मृत्युवरण गर्न सहयोग गर्ने बताउँथे र कतिलाई त उनले उनीहरुसँगै आफ्नो पनि जीवन अन्त्य गर्ने बताउने गर्दथे ।

जापानको समाचार एजेन्सी क्योडोले दिएको जानकारी अनुसार उनले अगस्ट २०१७ देखि अक्टोबर २०१७ का बीच १५ देखि २६ वर्ष बीचका ८ महिला र एक पुरुषको घाँटी थिची हत्या गरेको र उनीहरुको अंग क्षत–विक्षत गरेका थिए ।

सिरियल किलिङको यो मामिला पहिलो पटक हेलोविनमा सार्वजनिक भएको थियो जब टोकियो नजिकै जामामा टाकाहिरोको फ्ल्याटबाट शरीरका अंग बरामद भएका थिए । अनुसन्धानकर्ताका अनुसार उनको फ्ल्याटबाट थुप्रै हात र खुट्टाका हड्डीका साथै ९ वटा टाउको भेटिएको थियो र जापानी मिडियाले उनको घरलाई ‘हाउस अफ हरर’ बताएका थिए ।

सुनुवाईको क्रममा के भयो ?

अभियोजन पक्षले टाकाहिरोका लागि मृत्युदण्डको सजाय माग गरेका थिए र उनले पनि हत्या गरेको र अंगलाई क्षत–विक्षत गरेको कुरा स्विकार गरेका थिए । टाकाहिरोका वकिलका अनुसार उनी साधारण धाराका दोषी हुन् किनभने यो ‘सहमतिमा गरिएको हत्या’ को मामिला थियो किनभने पीडितले हत्याको अनुमति दिएका थिए ।

पछि टाकाहिरोको आफ्नो वकिलको तर्कसँग मतभेद भयो र उनले पीडितको सहमति नलिइकनै हत्या गरेको बताएका थिए । मंगलबार जुन न्यायाधिसले निर्णय सुनाएका थिए उनले भने, ‘कुनै पनि पीडित हत्याका लागि सहमत थिएनन् ।’

जापानी मिडिया एनएचकेका अनुसार गत महिना २५ वर्षकी एक पीडितका पिताले अदालतसमक्ष भनेका थिए, ‘टाकाहिरो मरेपनि म उनलाई माफी दिनेछैन ।’ उनले भनेका थिए, ‘अहिले पनि आफ्नी छोरीका उमेरका कुनै युवतीलाई देख्दा मलाई ती मेरै छोरीजस्तै लाग्छ । मेरो यो पीडा कहिले पनि जाने छैन । मलाई मेरी छोरी फिर्ता देउ ।’