भाद्र १४
काठमाडौं– सरकारले प्रदेशसभा र प्रतिनिधिसभाको निर्वाचन दुई चरणमा गर्ने निर्णय गर्दै मंसिर २१ गतेको अर्को मिति तय गरेको छ ।

सरकारले यसअघि दुवै निर्वाचन एकै पटक गर्ने भन्दै मंसिर १० गतेको मिति तोकेको थियो । तर, आज बसेको मन्त्रिपरिषद् बैठकले निर्वाचन आयोगबाट प्राप्त सुझावका आधारमा दुई चरणमा चुनाव गर्ने गरी दोस्रो चरणको निर्वाचन मिति मंसिर २१ गतेलाई तोकिएको सञ्चारमन्त्री तथा सरकारका प्रवक्ता मोहन बस्नेतले जानकारी दिए ।

दुई चरणमा चुनाव गरिने भएपनि कुन जिल्लामा कुन चरणमा गर्ने भन्नेबारे चाहि स्पष्ट पारिएको छैन । निर्वाचन आयोगसँग परामर्शको आधारमा सोबारे थप निर्णय लिइने बस्नेतले बताए ।

बस्नेतले प्रदेश प्रमुख र प्रदेशको राजधानीको बारे राजनीतिक सहमतिको आधारमा राजनीतिक समितिले निर्णय गर्ने बताए ।

प्रदेश प्रमुख र प्रदेशको राजधानीबारे राजनीतिक सहमतिका आधारमा छलफल गरी निर्णय लिने निश्कर्ष निकालेको मन्त्रिपरिषद् बैठकले संबैधानिक परिषद्बाट पदाधिकारी सिफारिस गर्ने गरी राष्ट्रिय प्रकृति तथा वित्त आयोग गठन गर्ने निर्णय गरेको छ ।

यस्तै, सरकारले एशियाली विकास बैंकबाट भन्सार क्षेत्रको सुधार तथा आधुनिकीकरणका लागि प्राप्त १५ अर्ब ४८ करोड रुपैयाँ ऋण अनुदान सहायता स्वीकार गर्ने निर्णय पनि गरिएको छ ।

यस्तै केही प्रहरी बरिष्ठ उपरिक्षक पद खारेज गरी प्रहरी नायक महानिरिक्षक पदको दरबन्दी सृजना गर्ने बारे पनि छलफल भएको छ । तर, निर्णय भइनसकेको सरकारका प्रवक्ता बस्नेतले जानकारी दिए ।

चार सचिवको सरुवा

बैठकले चार जना सचिवहरुको सरुवा गर्ने निर्णय पनि गरेको छ । भूमिसुधारबाट आपूर्ती मन्त्रालयमा कृष्णराज देवकोटालाई लाने निर्णय मन्त्रिपरिषद्को बैठकले गरेको छ । त्यस्तै, भूमिसुधारमा शम्भु कोइराला, खानेपानी तथा सरसफाई मन्त्रालयमा कृष्णराज बिसी र पर्यटन मन्त्रालयमा महेश्वर न्यौपानेलाई सरुवा गरिएको छ ।