विराटनगर । मोरङ बेलबारीका सुभाष तामाङले जीवित हुँदै परिवारले मृत्यु दर्ता गरिदिएपछि फेरि जीवित भएको प्रमाण प्राप्त गर्न कति दुःख र हन्डर खानुपर्छ भन्नेमा गतिलो उदाहरण बनेका छन् । उनले आफु जीवितै भएको प्रमाण प्राप्त गर्न तीन वर्ष कुर्नुमात्र परेन, निकै सास्ती झेल्नु प¥यो ।

पञ्जीकरणमा मृतक उल्लेख भएको तर आफू जीवितै रहेको अवस्थामा उनले नागरिकताका लागि स्थानीय तहदेखि गृह मन्त्रालयसम्म तीन वर्षदेखि भौंतारिनु परे पनि बल्ल आफू जीवित रहेको प्रमाणपत्र प्राप्त गरेका छन् । तीन वर्ष धाएपछि बल्ल बिहीबार सुभाषले नागरिकता प्राप्त गरे । उनले आफू जीवित भएको प्रमाण पनि प्राप्त गरेका छन् ।

उनलाई मोरङका प्रमुख जिल्ला अधिकारी कोषहरि निरौलाले नागरिकताको प्रतिलिपि हस्तान्तरण गरेका छन् । निरौलाले मृत्युदर्ता हुनु अघि भोजपुरबाट बसाई सराई गरेर मोरङ आएको प्रमाणको आधारमा सुभाषको मृत्युदर्ता झुटो ठहर भएपछि नयाँ नागरिकता दिएका हुन् ।

उक्त निर्णयसँगै सुभाषलाई प्रजिअ निरौलाले जिल्ला प्रशासन कार्यालय भोजपुरबाट २०६० पुस २१ गते जारी भएको ४८४१–११–२५४४ नम्बरको पुरानै नागरिकताको नयाँ प्रतिलिपि हस्तान्तरण गरेका हुन् । ढिलै भए पनि नागरिकता पाएकोमा आफूलाई खुसी लागेको र संसारै जितेको अनुभव भएको बताएका छन् ।

घटना यस्तो थियो

पाँच वर्ष अघि वैदेशिक राजगारीका लागि सुभाष साउदी अरब पुगेका थिए । २०७२ असार २५ गते सडक दुर्घटनामा उनको मृत्यु भएको खबर दूतावासमार्फत आएको थियो । दुर्घटनामा दुई जनाको मृत्यु र दुई जना घाइते भएका थिए । दुई मृतकमध्ये एकजना सुभाष नै भएको भन्दै उनी कार्यरत कम्पनीमार्फत शवलाई साउदीबाट नेपाल पठाइएको थियो ।

शव आएपछि परिवारका सदस्यले बुझेर परम्परा अनुसार दाहसंस्कार समेत गरेका थिए । तर सुभाषको भनिएको शव भने सोही दुर्घटनामा परेका बागलुङ जिल्लाको ढोरपाटन–६ का तेजेन्द्र भण्डारीको भएको पछि खुलेको थियो ।

त्यतिबेला भोजपुर जिल्लाको साविक कुदाकाउले गाविस–९ ९हालको षडानन्दा नगरपालिका–२० मा रहेका परिवारले २०७२ साउन ६ गते सुभाषको मृत्यु दर्ता गरेका थिए । तर पछि उनी जीवितै रहेको खबर आएको थियो ।

घर परिवारले काजकिरिया समेत गरिसकेका कारण सुभाष साउदीबाट फर्किएपछि न्वारन लगायतका धार्मिक संस्कार पुनः दोहो¥याएर गरेका थिए । कुदाकाउलेबाट मोरङको बेलबारी नगरपालिका–११ मा बसाई सरेर आएपछि आफु जीवित रहेको भन्दै नागरिकताका लागि उनले स्थानीय तहदेखि गृह मन्त्रालयसम्म धाउनु परेको थियो । पञ्जीकरणमा मृत्यु घोषित भइसकेका कारण उनलाई सरकारी कार्यालयबाट सेवा लिन समस्या भएको थियो ।