काठमाडौं । डेब्यु खेलमै सविता रानामगर र प्रीति राईको गोल गरेपछि पहिलोपटक दशरथ रंगशालामा खेल्ने मौका पाएको नेपालले अन्तर्राष्ट्रिय मैत्रीपुर्ण खेलमा बंगलादेशलाई २–१ ले पराजित गरेको छ ।

त्रिपुरेश्वरस्थित दशरथ रंगशालामा बिहीबार भएको खेलको १३औं मिनेटमा सविता रानामगरले गोल गर्दै नेपाललाई सुरुवाती अग्रता दिलाइन् । बिमला चौधरीको क्रसलाई सविताले बंगलादेशकी गोलरक्षक रुप्ना चक्मा र डिफेन्डरबीचबाट हेडरमार्फत बललाई जाली चुमाएकी थिइन् ।

२३औं मिनेटमा अर्का डेब्यु मिडफिल्डर प्रीति राईले सरु लिम्बुले दिएको चलाखीपुर्ण पासमा पेनाल्टी बक्सबाहिरबाट दर्शनीय गोल गर्दे नेपालको अग्रता दोब्बर पारिन् ।

६९औं मिनेटमा मोसामत सोप्नाले मैदानको मध्यभागबाट एक्लै बल अघि बढाउँदै पेनाल्टी बक्सभित्रबाट दिएको क्रसलाई रितु पोर्न चक्माले हेडर प्रयास गरेपनि भेट्न नसक्दा बंगलादेशले गोल अन्तर कम गर्न सकेन । ७९औं मिनेटमा श्रीमोती सरकारको प्रहारलाई नेपाली टोलीकी गोलरक्षक एन्जिला तुम्बाप्पो सुब्बाले पञ्च गर्दै बचाउँदै नेपालको खतरा टारिन् ।

८३औं मिनेटमा थोउरा खातुनले मैदान प्रवेश गरेको केही सेकेन्डमा गोल गर्दै खेललाई २–१ को अवस्थामा ल्याएपनि त्यसपछि नेपालले आफ्नो अग्रतालाई जोगाउन सफल भयो ।

यस खेलमा प्रशिक्षक ग्यारी फिलिप्सले पहिलो रोजाईमा सविता रानामगर र प्रीति राईलाई डेब्यु दिदा सब्सिच्युट खेलाडीको रुपमा सिर्जना सिंह र रश्मी कुमारी घिसिङलाई डेब्यु गराइन् ।

दोस्रो मैत्रीपुर्ण खेल आइतबार साँझ ५ बजे त्रिपुरेश्वरस्थित दशरथ रंगशालामा हुनेछ । उज्वेकिस्तानमा आयोजना हुने एएफसी कप २०२२ छनोट अघि नेपाल र बंगलादेशले दुई मैत्रीपुर्ण खेल खेलेको हो । नेपाली महिला टोलीले सन् २०२२ मा भारतमा हुने एसियन कपको छनोटका लागि उज्वेकिस्तानमा दुई खेल खेल्नेछ । उज्वेकिस्तानमा हुने छनोटमा नेपालले १८ सेप्टेम्वरमा फिलिपिन्स र २१ सेप्टेम्बरमा हङकङको सामना गर्नेछ ।