फुर्वा शेर्पा /टोकियो

‘स्वास्थ्यका लागि खेलकुद, राष्ट्रको लागि खेलकुद’ भन्ने नाराका साथ गत अगस्ट ७ तारिख आइतबारदेखि नारितामा शुरु भएको प्रथम डाइमण्ड कप फुटसल प्रतियोगिता २०२२ सम्पन्न भएको छ ।

२६ टिम सहभागी फुटसल प्रतियोगितामा काभ्रेली समाज जापानलाई  २–१ गोल अन्तरले पराजित गर्दै अल स्टार एफसी टोकियोले उपाधि जित्न सफल भएको छ । लमजुङ कालिका एफसीले तेस्रो स्थान हासिल गरेको छ ।

प्रतियोगितामा प्रथम स्थान हासिल गर्न सफल अल स्टार एफसी टोकियोले  ५ लाख ११ हजार १११ रुपैयाँसहित ट्रफी मेडल र प्रमाणपत्र दोस्रो स्थान हासिल गर्न सफल काभ्रेली समाज जापानले २ लाख २२ हजार २२२ येनसहित ट्रफी मेडल र प्रमाणपत्र र प्राप्त गरेको छ । यसैगरी तेस्रो स्थान हासिल गर्न सफल लमजुङ कालिका एफसीले ५३ हजार ३३३ येनसहित ट्रफी मेडल र प्रमाणपत्र प्रदान गरिएको आयोजकले जनाएको छ ।

यसैगरी प्रतियोगिताको अनुशासित टिमतर्फ सिजोओका युनाइटेड क्लव, बेस्ट प्लेयर तर्फ काभ्रेली समाज जापानका रजिन पाण्डे, बेस्ट डिफेन्सरतर्फ लमजुङ कालिका एफसीका अर्जुन गुरुङ, बेस्ट किपरतर्फ अल स्टार एफसी टोकियोका प्रवीन घर्ती मगर र डायमण्ड नारिताका नवीन तामाङ सर्वाधिक गोलकर्ताको अवार्ड जित्न सफल भए ।
अनुशासित टिमको उपाधि जितेका सिजोओका युनाइटेड क्लवलाइ २१ हजार १११ येनको साथमा ट्रफी , उत्कृष्ट खेलाडी, उत्कृष्ट डिफेन्डर, उत्कृष्ट किपर र सर्वाधिक गोलकर्ता १०–१० हजार येन प्राप्त गरे ।

जापानमा रहेका नेपालीहरुबीच भाइचारा, मेलमिलाप र आपसी सद्भावलाई अझ प्रगाढ बनाउनका लागि पहिलो पटक नारितामा जापानव्यापी फुटसल प्रतियोगिता आयोजना गरेको आयोजक संस्थाका अध्यक्ष नवीन दीप गुरुङले बताउनुभयो । उनकाअनुसार नेपाली कला र संस्कृतिको जगेर्ना गर्ने हेतुले आयोजित प्रतियोगितामा स्थानीय कलाकारहरूको नृत्य पनि प्रस्तुत भएको थियो ।