टोकियो/जापान। सेप्टेम्बर ७ तारिखबाट जापान प्रवेश थप सहज हुने भएको छ । कोभिड संक्रमण भई घरमै आरम गरिरहेका प्रधानमन्त्री किशिदा नियमित काममा फर्किएसंगै गरिएको एक पत्रकार सम्मेलनमा बताए अनुसार सेप्टेम्बर ७ तारिखदेखि दैनिक ५० हजार जना यात्रुहरुले जापान प्रवेश गर्न सक्नेछन् ।

हालसम्म, कोभिड संक्रमण नियन्त्रणको प्रयास स्वरुप दैनिक २० हजार जना यात्रुहरुले मात्रै जापान प्रवेश गर्नसक्ने प्रावधान कामय छ । जापानमा कोभिड संक्रमण नघटेको भएता पनि महामारीका कारण तहसनहस अर्थतन्त्रलाई कुनै पनि उपायले पुनर्जीवित गर्ने प्रयासमा जापान सरकारले कोभिड नियन्त्रण उपायहरु खुकुलो बनाउँदै लगेको छ ।

सेप्टेम्बाट जापान सरकारले यात्रुसंख्या बढाउनुका साथै कोरोनाको ३ वटै खोप लगाएका यात्रुहरुले साथमा कोरोना खोप लगाएको प्रमाण भएको खण्डमा पिसिआर नेगेटिभ रिपोर्ट समेत देखाउनु नपर्ने गरी यात्रा सहज गराउँदैछ ।

लामो सयम सबै क्षेत्रहरु बन्द गरि,कोरोना रोकथाम गर्ने प्रयास गरेको जापान अन्ततः किशिदा सरकारको आगमन पश्चात यसलाई अन्य मुलुकहरुले अप्नाएकै मोडालिटीमा सामान्यकरण गर्ने बाटोमा अघि बढेको हो । जापानले अब सबै प्रकारका भिसा बाहकहरुलाई लगभग साविककै अवस्थामा जापान प्रवेश गराउने बुझिएको छ ।