टोकियो/जापान। कच्चा पदार्थको बढ्दो मूल्य र येनको अवमूल्यनका कारण जापानका ठूला घरेलु उत्पादकहरूले यस वर्ष सबै जसो उत्पादनहरुको मूल्य वृद्धि गरिसकेका छन् ।

बाँकी रहेका केहि वस्तुहरुको मूल्य पनि यहि वर्षको अन्त्यसम्ममा बढाउने घोषणा गरिसकेका छन् । एक निजी क्षेत्रको अनुसन्धान कम्पनी तेईकोकु डाटाबैंकले गत महिनाको अन्त्यसम्ममा जापानका १०५ प्रमुख खाद्य र पेय पदार्थ उत्पादकहरूको सर्वेक्षण गरेको थियो।

उक्त सर्वेक्षणमा कम्पनीले मूल्य बढाउनको लागि चालेको कदमहरुको समेत विश्वेषण गरिएको थियो । उक्त सर्वेक्षण अनुसार लगभग८० प्रतिशतले यस वर्ष कच्चा पदार्थको मूल्य बढेको र येनको मूल्य निरन्तर घटेका कारण मूल्य बढाइसकेको वा वर्ष भित्र मूल्य बढाउने योजना बनाएको बताएका थिए ।

मूल्यवृद्धि भईसकेका तथा यहि वर्षभित्र मूल्य बढ्ने सामानहरू सहित २०,०५६ वस्तुहरु पुगेका छन् । जुलाईको अन्त्यमा गरिएको अघिल्लो सर्वेक्षणको तुलनामा १,५०० भन्दा बढी वस्तुहरूको मूल्य बढेको छ। यो बिचमा औसत मूल्य १४ प्रतिशतले मूल्य बढेको छ।

उक्त सर्वेक्षण अनुसार, यस महिना २ हजार ४ सय २४ वस्तुको भाउ बढाइनेछ भने अर्को महिना ६ हजार ५३२ वस्तुको मूल्य बढाइने छ । मूल्य वृद्धि भएका वस्तुहरुको प्रकार अनुसार हेर्दा,डिब्बाहरुमा प्याक भएका खाना, ह्याम र ससेज जस्ता ८,५३० प्रकारका “प्रशोधित खाद्य पदार्थहरू”को सबैभन्दा बढी मूल्य वृद्धि भएको थियो ।

त्यसपछि “सिजनिङ” अन्तर्गतका ४,६५१ वस्तुहरू, “मादक पेय पदार्थ र पेय पदार्थहरू” अन्तर्गत ३,८१४ वस्तुहरूका मूल्य बढेका छन् । मूल्य वृद्धिको यो लहर अर्को महिना थप चरम अवस्थामा पुग्नेछ । बिजुली र खाना पकाउने तेलको मूल्य उच्च रहन्छ भने अन्य वस्तुहरुको मूल्य वृद्धि पनि जारी हुन सक्छ।”