टोकियो/जापान। जापानको ओकिनावामा पहिलो पटक नेपाल फेस्टिवल आयोजना हुने भएको छ । यस अघि टोकियो, फुकुओका तथा नागोयामा नेपाल फेस्टिवल आयोजना भईसकेको छन् भने पहिलो पटक ओकिनावामा नेपाल फेस्टिवल आयोजना गरिन लागिएको हो ।

ओकिनावावासी नेपालीहरुको संयुक्त आयोजनामा प्रथम ओकिनावा नेपाल फेस्टिवल २०२२ आगामी नोभेम्वर २० तारिख आयोजना गरिन लागिएको आयोजक समितिका सदस्य राहुल शाहले नेपालन्युजपोस्टडटकमलाई जानकारी दिए ।

“One country many stories” (वान कन्ट्री मेनी स्टोरिज)भन्ने नारा सहित नेपाल तथा जापानको सांस्कृतिक झाँकी प्रस्तुती, नेपाली खाना, नेपाली पहिरन, नेपाली सांस्कृतिक, परम्परागत पहिरन तथा सामग्री प्रदर्शनी सहित नेपालको पर्यटन प्रर्वद्धन गर्ने उदेश्य सहित फेस्टिवल आयोजना गर्न लागिएको शाहले जानकारी दिए

प्राप्त जानकारी अनुसार फेस्टिवलमा जापानी समुदायको सहभागीता बढाउन तथा नेपाल जापान सम्वन्धलाई जनस्तरमा थप मजबुत बनाउन जापानी सांस्कृतिक प्रस्तुतीहरु सहित रक्तदान कार्यक्रम समेत राखिने छ । शाहका अनुसार,ओकिनावा नेपाल फेस्टिवलको संयोजनमा ३० जनाभन्दा बढी युवाहरुको सकृयता रहेको छ ।

नेतृत्वमा केहि व्यक्तिहरु मात्रै देखिए पनि करिव ५ हजार नेपालीहरुको बसोबास रहेको ओकिनावावासी सबैको आयोजनामा स्थानिय संघसंस्थाहरुलाई सह आयोजक राखेर फेस्टिवल गरिने तय भएको बताईएको छ । फेस्टिवल ओकिनावाको उमिसोरा कोएन, नाहामा नोभेम्वर २० तारिख आइतबारको दिन बिहान १० बजेबाट साँझ ६ बजेसम्म आयोजना गरिने भएको छ ।

ओकिनावा प्रिफेक्चरमा नेपालको सांस्कृतिक चिनारी सहित पर्यटन प्रर्वद्धनको लागि यस्ता कार्यक्रम हालसम्म नभएकाले ओकिनावावासी सबै नेपाली र जापानवासी नेपालीहरुको साथ र सहयोग पाउने आयोजकको विश्वास रहेको छ ।