कानागावा/जापान। एक जूनियर हाईस्कुलकी छात्रालाई आत्महत्या गर्न सहयोग गरेको आशंकामा एक जना २८ वर्षिया युवकलाई कानागावा प्रिफेक्चरल प्रहरीले पक्राउ गरेको छ।

जापानी संचार माध्यमहरुका अनुसार गत महिनाको २९ तारिख कानागावा प्रिफेक्चरको सागामिहारामा पुलबाट हाम फालेर एक जुनियर हाईस्कुलकी छात्राले आत्महत्या गरेको र ति स्कुले विद्यार्थीलाई आत्महत्याको लागि सहयोग गरेको आशंकामा कानगावा प्रान्तीय प्रहरीले एक कम्पनी वर्कर २८ वर्षीय युवकलाई पक्राउ गरेको हो ।

बालिकाको शव सेप्टेम्बर २९ तारिख सागामी ताल नजिकैको खोलामा फेला परेको थियो। प्रहरीका अनुसार अभियुक्त युया नोजाकी साईतामा प्रिफेक्चरको साईतामा सहरमा बस्ने कम्पनीमा कार्यरत कर्मचारी हुन् ।

योकोहामामा बस्ने नोजाकी र युवतीबीच सामाजिक सञ्जाल साइटमा चिनजान भएको थियो । जानकारी अनुसार उनिहरुबिच चिनजान भएको सामाजिक संजालमा मानिसहरूले आत्महत्याको सोचाइ रहेको सङ्केत गर्दै टिप्पणीहरू सहितका पोस्ट गर्ने साईट थियो ।

नोजाकीले ती युवतीलाई सेप्टेम्बर २० मा साईतामा सहरमै भेटेको हुनसक्ने अनुमान गरिएको छ ।२३ सेप्टेम्बरको राती उनलाई सगामिहारा शहरको मिदोरी वडाको पहाडमा लिएर गएको र युवतीले त्यहिको एक पुलबाट हाम फालेको प्रहरीले जनाएको छ ।

केटीका अभिभावकले सेप्टेम्बर २१ मा उनी हराएको रिपोर्ट गरेपछि प्रहरीले खोजी गर्नेक्रममा ति युवतीलाई पहाडतर्फ लिएर जाँदै गरेको सडक क्यामेराको फुटेज फेला परेको थियो। पक्राउ पश्चात,ति युवाले युवतीलाई कसरी आफ्नो ज्यान लिने भन्नेबारे सुझाव दिएको स्वीकार गरेको प्रहरीले जनाएको छ । नोजाकीलाई सेप्टेम्बर २७ मा एक नाबालिग अपहरण गरेको अभियोगमा पक्राउ गरिएको थियो भने सोमबार आत्महत्यामा सहयोग गरेको अभियोग पनि थप गरि आवश्यक अनुसन्धान अघि बढाईएको छ ।