काठमाडौं । दोहोरी कलाकार जोडी शंकर क्षेत्री र बबिता बानियाँ ‘जेरी’ ले आजबाट वैवाहिक सम्बन्ध कानुनी रूपमै अन्त्य गरेका छन्। जिल्ला अदालत काठमाडौं पुगेर उनीहरूले आपसमा सम्बन्ध विच्छेद गरेका हुन्।

सम्बन्ध विच्छेदपछि जेरी निकै भावुक भएकी छन्। उनले सामाजिक सञ्जालमा लेखेकी छन्, ‘दोष भाग्यलाई दिउँ कि परिस्थितिलाई । मुटु जोगाउनकै लागि मुटुमा बसेको मान्छे हटाउनु पर्‍यो समयले तिमीले दिएका हर आँशुको थोपालाई मोती बनाउने कोसिस गर्ने छु । आजबाट अलग भइयो।’

लामो समयदेखिको विवादका कारण सामाजिक सञ्जाल तताइरहेका उनीहरुले बिहीबार काठमाडौं जिल्ला अदालत पुगेर डिभोर्स गरेका हुन्। उनीहरुले सहमतिमै सम्बन्ध विच्छेदका लागि निवेदन दिएका थिए। तर, प्रक्रिया नपुगेर उनीहरुको डिभोर्स भइसकेको थिएन। बिहीबार अदालत पुगेर सम्बन्ध विच्छेदको कागजमा हस्ताक्षर गरेका हुन्।

तीन वर्षअघि बिहे गरेका उनीहरुबाट एक छोरीको जन्म भएको छ। छोरीको उमेर सानै भएकाले अहिले आमासँगै बस्ने र लालनपालनको जिम्माचाहिँ शंकरले लिनुपर्ने सहमति भएको छ। उनीहरु दुवैजना लोकदोहोरी गायनबाट चर्चामा आएका थिए। दुवैले मिलेर दुईवटा दोहोरी साँझ पनि खोलेका थिए।