काठमाडौं । नेपालले अन्तर्राष्ट्रिय फुटबलमा पाकिस्तानलाई १४ वर्षपछि पराजित गरेको छ । घरेलु मैदानमा बुधबार भएको अन्तर्राष्ट्रिय मैत्रीपूर्ण खेलमा नेपालले पाकिस्तानलाई १–० ले पराजित गर्दै १४ वर्षपछि जित निकाल्न सफल भएको हो ।

त्यसयता नेपाल र पाकिस्तानबीच छैटौं पटक प्रतिस्पर्धा हुँदा सफलता हात पारेको हो । नेपालले पछिल्लोपटक सन् २००८ मा भएको साफ च्याम्पियनसिपमा पाकिस्तानमाथि ४–१ को जित निकालेको थियो ।

२ बराबरी र ३ हारको नतिजा निकालेको थियो । खेलको अन्त्यतिर फरवार्ड अन्जन विष्टले गोल गरेपछि नेपालले पाकितानसँगको अन्तर्राष्ट्रिय मैत्रीपूर्ण खेलमा १–० को जित निकालेको छ ।

त्रिपुरेश्वस्थित दशरथ रंगशालामा बुधबार भएको खेलको पहिलो मिनेटमा विमल घर्ती मगरले सुवर्ण अवसर पाएपनि उनले प्रहार गर्न ढिला गर्दा नेपाल अग्रता लिनबाट चुक्यो ।

११औं मिनेटमा काउन्टर अट्याकमा पाकिस्तानले अवसर पाएपनि एलामगिर घाँजीको पासलाई वाहिद खानले भेट्न नसक्दा गोलरक्षक दीप कार्कीले नियन्त्रणमा लिन सफल भए । ३८औँ मिनेटमा विमल घर्तिमगरको पासमा दिनेश राजवंशीले गोल गर्ने राम्रो अवसर पाएपनि सदुपयोग गर्न सकेन । दोस्रो हाफ फितलो बनेपनि नेपालले गोल गर्न सफल भयो ।

८३औं मिनेटमा अन्जन विष्टले गोल गर्दे नेपाललाई १–० को अग्रता दिलाए । सुनिल बलको क्रस पासलाई अनमार्क रहेका अन्जनले गोलरक्षकलाई बिट गर्दै वान टचमा गोल गर्न सफल भएका हुन् । उनको यो ११औं अन्तर्राष्ट्रिय गोल हो ।

अब उनी नेपालको सर्वाधिक गोलकर्ता निराजन रायमाझी र हरि खड्काको १३ गोलको कीर्तिमानभन्दा दुई गोलले पछि छ । विश्व फुटबलको सर्वाेच्च निकाय (फिफा) ले प्रतिबन्ध फुकाएपछि झन्डै साँढे तीन वर्षपछि मैदान फर्किएको पाकिस्तानले पनि केही आक्रमण बुनेपनि गोल भने गर्न सकेन ।