काठमाडौं । एसिसी प्रिमियर कपको फाइनलमा युएईलाई ७ विकेटले हराउँदै नेपालले एसिया कपमा स्थान बनाएको छ । नेपाल च्याम्पियन बन्दै एसिया कपमा भारत र पाकिस्तानसँगको भेट पक्का गरेको हो ।

नेपाल सन् २००२ पछि पहिलो पटक एसिया कपमा स्थान बनाएको हो । १ सय १८ रनको सामान्य विजयी लक्ष्य नेपालले ३० ओभर ३ बलमा ३ विकेट गुमाउँदै पूरा गर्यो । नेपालको जितमा गुलशन झाले ८३ बलमा ३ चौका र ६ छक्कासहित अविजित ६७ रनको योगदान दिए । भीम सार्की ७२ बलमा ४ चौकासहित ३६ रनमा क्रिजमा रहे ।

नेपालको सुरुवात भने राम्रो हुन सकेको थिएन । नेपालले दोस्रो ओभरको दोस्रो बलमै ओपनर कुशल भुर्तेललाई एक रनमा गुमाएको थियो । अर्का ओपनर आसिफ शेख ८ रनमा आउट भए । कप्तान रोहित पौडेललाई १ रनमै बोल्ड हुँदा नेपाल २२–३ को अवस्थामा पुगेको थियो । युएईका स्पिनर रोहन मुस्तफाले १० ओभरमा ३ मेडनसहित १३ रन खर्चेर २ विकेट लिए ।

त्यसअघि त्रिवि क्रिकेट मैदान कीर्तिपुरमा टस हारेर पहिला ब्याटिङको निम्तो पाएको युएई ३३.१ ओभरमा १ सय १७ रनमा अल आउट भयो । सोमबार वर्षाको कारण २७.३ ओभरमा ९ विकेट गुमाउदै १ सय ६ रन बनाएको अवस्थामा खेल रोकिँदा मंगलबार ११ रन जोड्दै युएई १ सय १७ रनमा अल हुन पुगेको थियो ।

आसिफ खानले सर्वाधिक ४६ रन बनाए । जहुर खान पनि आउट भए । तर पानी परेपछि खेल स्थगित भएको थियो । अन्तिम विकेटको रुपमा जुनैद सिद्दिक १० रनमा आउट भए । युएईका कप्तान मोहम्मद वासिम ११ रनमा आउट भए । वृत्य अरविन्द ८ रनमै क्याच आउट भए । आर्यन लाक्रा १३ रनमा आउट भए । रमिज शाहजाद ५ रनमा क्याच आउट भए । रोहन मुस्तफा २ रनमा क्याच आउट भएपछि युएई ५१–५ को दयनीय अवस्थामा पुगेको थियो ।

बसिल १० रनमा बोल्ड आउट भए । नेपालको जितमा स्पिनर ललितनारायण राजवंशीले ७.१ ओभरमा २ मेडनसहित १४ रन खर्चेर सर्वाधिक ४ विकेट लिए । सन्दीप लामिछानेले १० ओभरमा २ मेडनसहित ३४ रन खर्चेर २ विकेट लिए । करण केसीले ७ ओभरमा १ मेडनसहित २६ रन खर्चेर २ विकेट लिए । सोमपाल कामी र गुलशन झाले सामान एक विकेट लिए ।

एसिया कप आगमी सेप्टेम्बरमा पाकिस्तानमा हुनेछ । समूह ए मा नेपाल र पाकिस्तान हुनेछन् । समूह बी मा बंगलादेश, श्रीलंका र अफगानिस्तान छन् ।