काठमाडौ. । एसियाली खेलकुद (एसियाड) अन्तर्गत क्रिकेटको क्वाटरफाइनलमा नेपालले सानदार ब्याटिङ प्रदर्शन गरेपनि भारतसँग २३ रनले पराजित भएको छ।
यससँगै नेपाल एसियाडबाट बाहिरिएको छ ।

जितको लागि २ सय ३ रनको विशाल विजयी लक्ष्य पछ्याएको नेपालले निर्धारित २० ओभरमा ९ विकेट गुमाउँदै १ सय ७९ रनमात्र बनाउन सक्यो । नेपालका दीपेन्द्रसिंह ऐरीले सर्वाधिक ३२ रनको योगदान दिएपनि हार टार्न सकेन । सन्दीप जोरा २९ रनमा आउट भए ।दीपेन्द्र र सन्दीप जोराले पाँचौं विकेटका लागि २० बलमा ४८ रनको साझेदारी गर्दे जितको सम्भावना देखाएपनि त्यो पर्याप्त रहेन। नेपालले विष्फोटक ब्याटिङका साथ भारतलाई खेलमा दबाबमा राखेको थियो । नेपाललाई जितको लागि १९ बलमा ४७ रन चाहिँएको थियो ।

१७औं ओभरको अन्तिम बलमा सोमपाल कामी आउट भए । लगत्तै १८औं ओभरको पहिलो बलमा गुलशन झा पनि आउट भए । कुशल मल्ल २९ रनमा क्याच आउट भए । कप्तान रोहित पौडेल ३ रनमा एलबीडब्लू आउट भए । कुशल भुर्तेल २८ रनमा आउट भए ।

नेपाललाई ओपनर आसिफ शेख र कुशल भुर्तेलले ३.४ ओभरमा २९ रनको साझेदारी गरेका थिए । आसिफ १० रनमा क्याच आउट भए । करण केसी १३ बलमा १ चौका र २ छक्कासहित १८ रनमा नटआउट रहे । भारतका स्पिनर रवि विश्रोईले ४ ओभरमा २४ रन खर्चेर ३ विकेट लिए । साई किशोरले ४ ओभरमा २५ रन खर्चेर १ विकेट लिए । अर्शदीप सिंहले ४ ओभरमा ४३ रन खर्चेर २ विकेट लिए । आवेश खानले ४ ओभरमा ३२ रन खर्चेर ३ विकेट लिए ।

त्यसअघि झेजिङ युनिर्भसिटी कलेज अफ टेक्नोलोजी फिल्डमा टस जितेर पहिला ब्याटिङ थालेको भारतले निर्धारित २० ओभरमा ४ विकेट गुमाउँदै २ सय २ रन बनाएको थियो । भारतको जितमा यशस्वी जैसवालले ४९ बलमा ८ चौका र ७ छक्कासहित सर्वाधिक १ सय रनको शतकीय इनिङ खेलेका थिए ।

रिंकु सिंह ३७ रनमा नटआउट रहे । शिबम दुबे २५ रनमा क्रिजमा रहे । पहिलो विकेटका लागि जैसवाल र कप्तान ऋतुराज गायकवाडले ९.५ ओभरमा १ सय ३ रनको शतकीय साझेदारी गर्दै उत्कृष्ट सुरुवात दिलाए । गायकवाडले २५ रन बनाए । तिलक बर्मा २ रनमा आउट भए । जितेश शर्मा पाँच रनमा सन्दिप लामिछानेबाट कट एण्ड बोल्ड आउट भए । दीपेन्द्रसिंह ऐरीले २ तथा सोमपाल कामी र सन्दीप लामिछानेले समान १ विकेट लिए ।

नेपालले समूह चरणमा मंगोलियालाई २ सय ७३ रन र माल्दिभ्सलाई १ सय ३८ रनले हराएको थियो । भारतले अब बुधबार हुने बंगलादेश र मलेसियाबीचको विजेतासँग शुक्रबार सेमिफाइनल खेल्नेछ ।