आसियान शिखर सम्मेलनमा प्रधानमन्त्री ताकाइचीको पहिलो कूटनीतिक उपस्थिति,समुद्री सुरक्षा र कृत्रिम बुद्धिमत्ता सहकार्यमा जापानको प्रतिबद्धता

क्वालालम्पुर। जापानकी प्रधानमन्त्री सानाए ताकाइचीले आइतवार मलेसियाको क्वालालम्पुरमा सम्पन्न एसियाली राष्ट्रहरूको संगठन (आसिआन-ASEAN) शिखर सम्मेलनमा सहभागी हुँदै आफ्नो पहिलो प्रत्यक्ष कूटनीतिक सहभागिता जनाउनुभयो। उहाँले समुद्री सुरक्षा, कृत्रिम बुद्धिमत्ता(एआई-AI) र साइबर सुरक्षामा सहकार्य विस्तार गर्ने प्रतिबद्धता व्यक्त गर्नुभयो।

गत मंगलबार मात्र पदभार ग्रहण गर्नुभएकी ताकाइचीले आसियान सदस्य राष्ट्रहरूसँग जापानको सम्बन्धमा देखिएको प्रगतिको प्रशंसा गर्दै अझै “क्षेत्रीय शान्ति र स्थिरता” का लागि थप काम गर्न आवश्यक रहेको बताउनुभयो।ताकाइचीले जापानले “समान सोच भएका” देशहरूको रक्षा क्षमता सुदृढ गर्नका लागि क्षेत्रीय स्तरमा अफिसियल सेक्युरीटी असिस्टेन्ट(OSA) विस्तार गर्ने घोषणा गर्नुभयो।

उहाँले अर्को नयाँ पहलको रूपमा “जापान – आसियान एआई सह–सृजन पहल (Japan-ASEAN AI Co-creation Initiative)” सुरु गर्ने प्रस्ताव पनि गर्नुभयो, जसअन्तर्गत जापानले क्षेत्रीय देशहरूलाई एआई प्रशिक्षण, नीति तथा सुशासन प्रणाली निर्माण, र ठूला भाषा मोडेलको विकासमा सहयोग पुर्‍याउने बताउनुभयो।