काठमाडौँ । प्रतिविम्ब ओपन स्काउट क्र्यूले आज प्रथम स्काउट दिक्षान्त समारोह सम्पन्न गरेको छ । क्र्यूमार्फत १८ जना रेञ्जर स्काउट र ८ जना रोभर स्काउट दिक्षित भएका हुन् ।

क्र्यूका अध्यक्ष श्याम लामाको अध्यक्षतामा सम्पन्न दिक्षान्त समारोहमा जिल्ला स्काउट कार्यालय काठमाडौँका जिल्ला समन्वय आयुक्त शिवराम अर्यालले दल समितिलाई स्काउट प्रतिज्ञा गराई स्कार्फ प्रदान गरेका थिए । त्यसैगरी रोभर स्काउटहरुलाई रोभर लिडर छोइसाङ्ग तामांग र रेज्नर स्काउटहरुलाई ज्ञानी रसाइलीले दिक्षा दिएका थिए ।

नयाँबजार स्थित ह्वाइट फिल्ड स्कुलमा सम्पन्न दिक्षान्त कार्यक्रममा बोल्दै प्रमुख अतिथि अर्यालले काठमाडौँ जिल्लामा नयाँ क्र्यू संचालन भएकोमा खुशी व्यक्त गर्दै आफुले भरपुर सहयोग गर्ने प्रतिवद्धता ब्यक्त गरे ।

बोल्ने क्रममा जिल्ला कार्यक्रम आयुक्त सुरज खनालले क्र्यू शुरु हुनु आफैमा ठुलो भए पनि निरन्तरता अझ ठुलो कुरो भएको भन्दै निरन्तरताको शुभकामना ब्यक्त गरे ।

त्यसैगरि सहायक राष्ट्रिय प्रशिक्षक राजिव खत्री र शम्भुराज शर्माले पनि क्र्यूको विकास र निरन्तरताको शुभकामना व्यक्त गरे ।

यस प्रतिविम्ब स्काउट क्र्यूसंगै काठमाडौँ जिल्ला जिल्लामा २३ क्र्यू संचालनमा रहेका छन् ।