लुसाका, जेठ ३१ । राष्ट्रपतिको सम्बोधन बहिष्कार गरेको आरोपमा ४८ सांसदलाई ३० दिनका लागि निलम्बन गरेको जाम्बियाको संसदले जनाएको छ ।
राष्ट्रपति एडगार लुङ्गुले गएको मार्चमा निर्वा्चित भएपछि गरेको संसदको सम्वोधनमा प्रतिपक्षी दल यूपीएन्डीका सांसदले विरोध स्वरुप बहिस्कार गरेका थिए । सभामुख प्याट्रिक मातिविनीले आफूले राष्ट्रपतिको सम्बोधन बहिस्कार गर्ने ४८ सांसदलाई आफूमाथि निहित कानूनी अधिकारको प्रयोग गरी ३० दिनका लागि निलम्वन गर्ने निर्णय लिएको बताएका छन् । निलम्बनमा परेका प्रतिपक्षीदल पार्टी फर युनाइटेड नेसनल डेभलपमेन्ट (यूपीएनडी) का नेता हाकुन्दे हिचिलेमाले आफ्ना सांसदविरुद्ध गरिएको कारबाहीप्रति प्रतिक्रिया दिँदै अझ पनि कसैलाई निरङ्कुश शासनका विषयमा शङ्का छ भने संसदले आफ्ना सांसदमाथि गरेको घटनाको बिष्लेषण गर्न आग्रह गरे ।

प्रजातान्त्रिक अभ्यासअनुसार संसदमा उपस्थित हुने नहुने आफ्नो दलको निर्णय भएको भन्दै उनले सांसदलाई संसदमा विरोध जनाउन अनुपस्थित भएको घटनामा कारबाही गरिनु कहाँको प्रजातन्त्र हो भनी प्रश्न गरे ।