काठमाडौं । दक्षिण एसियाली पावरस हाउस भारतसँग नेपालले अन्तर्राष्ट्रिय मैत्रीपुर्ण फुटबलमा बराबरी खेलेको छ । नेपालले एक गोलको अग्रता जोगाउन नसक्दा भारतसँग १–१ गोलको बराबरी खेलेको हो ।

त्रिपुरेश्वरस्थित दशरथ रंगशालामा बिहीबार भएको खेलमा नेपालले ३६औं मिनेटमा अन्जन विष्टको गोलबाट अग्रता लिएको थियो । भारतीय डिफेन्डर चिनलेनािना सिंह कोन्सामको ब्याकपासलाई गोलरक्षक गुरुप्रित सिंह सन्धुले नभेट्दै अन्जनले नियन्त्रण्मा लिदै गोल गरेका थिए ।

६०औं मिनेटमा सुनिल क्षेत्रीले १८ यार्ड टाढाबाट गरेको प्रहारलाई गोलरक्षक किरण चेम्जोङले पञ्च गर्दै बचाएपनि किरणसँगै रहेका सब्सिच्युट अनिरुद थापाले गोल गर्दै खेललाई १–१ गोलको बराबरीमा ल्याए । त्यसपछि दुवै टोलीबाट गोलका केही अवसरहरु सिर्जना भएपनि थप गोल निस्कन नसक्दा खेल बराबरीमा सकियो । दोस्रो मैत्रीपुर्ण खेल आइतबार हुनेछ ।

नेपाल र भारत दुवै टोली साफ च्याम्पियनसिपको तयारीमा रहेको छ । साफ च्याम्पियनसिप अर्काे महिना माल्दिभ्समा आयोजना हुदैछ ।