काठमाडौं । कप्तान ज्ञानेन्द्र मल्लको कीर्तिमानी अर्धशतक र तीव्र गतिका बलर करण केसी र स्पिनर सन्दीप लामिछानेको उत्कृष्ट बलिङ प्रदर्शनपछि नेपालले आइसीसी विश्वकप लिग–२ त्रिकोणात्मक ओडिआई सिरिज अन्तर्गतको खेलमा ओमानमाथि ऐतिहासिक सानदार जित निकालेको छ ।

नेपालले ओमानलाई ७ विकेटले पराजित गर्दै ८ वर्षपछि ओमानलाई हराएको हो । १२२ रनको सामान्य विजयी लक्ष्य नेपालले १८ ओभर २ बलमा ३ विकेटको क्षतिमा पुरा ग¥यो । नेपालको जितमा कप्तान ज्ञानेन्द्र मल्ल ४६ बलमा ४ चौका र २ छक्कासहित ५२ रनमा अविजित रहे ।

शरद भेषावकरले विजयी रन बटुल्दै एक रनमा अविजित रहे । ज्ञानेन्द्रले ४३ बलमा आफ्नो ओडिआई करिअरको चौथो अर्धशतक प्रहार गरेका थिए । ज्ञानेन्द्र नेपालबाट ओडिआईमा चार अर्धशतक प्रहार गर्ने पहिलो ब्याट्सम्यान बनेका छन् । ज्ञानेन्द्रले नेस्टर धम्बालाई छक्का प्रहार गर्दै अर्धशतक पूरा गरेका थिए ।

युवा ब्याट्सम्यान तथा ओपनर आसिफ शेखले ४४ बलमा ७ चौकासहित ४० रनको योगदान दिए । नेपाललाई सहज जित दिलाउन आसिफ र ज्ञानेन्द्रले दोस्रो विकेटका लागि ९५ रनको कीर्तिमानी साझेदारी गरेका थिए ।

कुशल भुर्तेल कलिमुल्लाहको चौथो ओभरको पहिलो बलमा खराब सटका साथ फस्ट स्लिपमा जतिन्दर सिंहबाट ६ रनमा क्याच आउट हुँदै पेभिलिएन फर्केका थिए । रोहित कुमार पौडेल ६ रनमा आउट भए । ओमानका नेस्टर धम्बाले सर्वाधिक दुई विकेट लिए । कलिमुल्लाहले एक एक विकेट लिए ।

त्यसअघि अल अमरेत क्रिकेट मैदान मस्कटमा तीव्र गतिका बलर करण केसी र स्पिनर सन्दीप लामिछानेको उत्कृष्ट बलिङ प्रदर्शनपछि नेपालले ओमानलाई ३७ ओभर १ बलमा १ सय २१ रनमा अलआउट गरेको थियो । ओमानका कप्तान जिशान मकसुदले ६६ बलमा २ चौका र १ छक्कासहित सर्वाधिक ४१ रनको योगदान दिए ।

कप्तान मकसुद बाहेक अन्य कुनैपनि ब्याट्सम्यानले राम्रो प्रदर्शन गर्न सकेनन् । नेपालको घातक बलिङसामू ओमानका ७ खेलाडीले दोहोरो अंकमा रन बनाउन सकेनन् । करणको तेस्रो ओभरको चौथो बलमा ओपनर जतिन्दर सिंह आसिफ शेखबाट १३ रनमा क्याच आउट हुन पुगे । पहिलो खेलमा नेपालविरुद्ध शतक प्रहार गरेका जतिन्दरले दोस्रो खेलमा १३ बलमा १ चौका र १ छक्का प्रहार गरे ।

जतिन्दर आउट भएपछि ओमानले लगातार विकेट गुमाएको थियो । सुफ्यान मोहम्मद ४ रनमा, अयान खानलाई ७ रनमा बोल्ड आउट भए । मोहम्मद नदीमलाई ४ रनमा एलबीडब्लू आउट गरे । नेपाली मुलका विकेटकिपर सुरज कुमारलाई शून्यमा बोल्ड आउट गरे । त्यसपछि पार्टटाइम स्पिनर शरद भेषावकरले दुई विकेट लिँदै ओमानलाई दवाव बढायो ।

शरदले २२औं ओभरको दोस्रो बलमा सन्दीप गौडे सुशान भारीबाट ८ रनमा क्याच आउट गराए । ओडिआईमा शरदको यो पहिलो विकेट हो । शरदको ३०औं ओभरको चौथो बलमा नसीम खुसी १२ रनमा कुशल भुर्तेलबाट क्याच आउट भए । तल्लोक्रमका कलिमुल्लाह १२ र विलाल खानले ९ रन बनाए ।

नेपालका सन्दीप लामिछानेले ८.१ ओभरमा २ मेडनसहित १८ रन खर्चेर ४ विकेट लिए । करण केसीले ८ ओभरमा १ मेडनसहित २५ रन खर्चेर ४ विकेट लिए । स्पिनर शरद भेषावकरले ६ ओभरमा १ मेडनसहित २१ रन खर्चेर २ विकेट लिए ।

ओमानमाथिको जितसँगै नेपाल ८ खेलमा ४ जित र ४ हारका साथ ८ अंक जोडेर चौथो स्थानमा छ । ओमान १३ खेलमा १० जित र ३ मा हारसहित २० अंकका साथ शीर्ष स्थानमा छ ।