काठमाडौं । तेह्र वर्षपछि जन्मभूमी फर्किएका नेपाली मुलका बिकास मेराग्लिया ‘ए’ डिभिजन क्लब च्यासल युथ क्लबमा अनुबन्धित भएका छन् । इटालीबाट १३ वर्षपछि नेपाल फर्किएका १९ वर्षीय बिकासलाई च्यासलले आसन्न लिगका लागि अनुबन्ध गरेको हो ।

बिकास शुक्रबार औपचारिक रुपमा च्यासलमा आबद्ध भएका छन् । उनले १० नम्वरको जर्सी लगाउनेछन् । नेपाली मूलका इटालियन खेलाडी बिकासलाई च्यासलले विदेशी खेलाडीको कोटामा अनुबन्धन गरेको जनाएको छ

। खेलाडी सर्वजनिक गर्न शुक्रबार आयोजित पत्रकार सम्मेलनमा क्लबका अध्यक्ष रमेश व्यन्जनकार र विकासले सम्झौता पत्रमा हस्ताक्षण गरेका छन् । सम्झौता १ वर्षको रहेको छ । हुनेछ । इटालीमा व्यावसायिक फुटबल खेलिरहेका बिकासले इटालीको यु–१६ राष्ट्रिय टोलीबाट समेत खेलिसकेको बताइएको छ ।

‘ए’ डिभिजन लिग खेल्नका लागि उनी यसै साता जन्मभूमी फर्केका थिए । उनी सन् २००८ मा ६ वर्षको उमेरमा इटाली गएयता पहिलोपटक स्वदेश फर्केका हुन् । बिकासले इटालीको चर्चित क्लबमध्येको एक एटलान्टा र भेनेजियाकोको जुनियर टोली तथा काटोलिका र मारिग्लयानेसको सिनियर टोलीबाट पनि खेलिसकेको जनाएको छ ।

च्यासलका अध्यक्ष व्यन्जनकारले बिकासलाई आफ्नो क्लबबाट लिग खेलाउन पाउँदा खुसी लागेको बताएका छन् । च्यासल तेस्रो पटक ‘ए’ डिभिजन लिग खेल्ने तयारीमा छ । च्यासलका अध्यक्ष ब्यन्जनकारले विकासलाई ल्याउने लामो समयको प्रयास सफल भएको बताए । ‘हामीले बिकासलाई लामो समयदेखि पछ्याएका थियौं । कोरोना र उनको उमेर नपुग्दा यसअघि समस्या थियो । अन्ततः उनलाई अनुबन्ध गर्न सफल भएका छौं । क्लबले यस सिजन कुल २ करोडको बजेट अनुमान गरेको छ ।’ उनले भने ।

च्यासलले यसअघि टोलीको प्रशिक्षकमा बालगोपाल साहुखल र टेक्निकल डिरेक्टरमा ले मान्सनलाई अनुबन्ध गरिसकेको छ । क्लबले यो सिजन युक्यानको किट प्रयोग गर्नेछ ।