काठमाडौं । हाँस्यकलाकार जितु नेपालले दलहरुले कलाकारलाई प्रयोग मात्रै गरेको भनेर दलहरुसँग आक्रोश पोखेका छन् । राप्रपा छाडेर एमालेमा प्रवेश गरेकी चर्चित गायिका कोमल वलीलाई एमालेले टिकट नदिएपछि कलाकार नेपालले फेसबुकमा स्टाटस लेख्दै भनेका छन् दलहरूले कलाकारलाई उपयोग गरेको र त्यस विषयलाई कलाकारले पनि नबुझेको भन्दै असन्तुष्टि व्यक्त गरेका छन् । उनले एमालेले कोमल वलीलाई एमालेले हरियो घाँस देखाएर ठण्डाराम पारेको कुरा स्टाटसमा लेखेका छन् ।

फेसबुकमा स्टाटस लेख्दै कलाकार नेपालले भनेका छन् कलाकारलाई कार्यक्रममा भीड जम्मा गर्ने पात्र मात्र भन्ठान्नु दलहरुका लागी ठूलो भूल हुने समेत उनले चेतावनी दिएका छन् । उनले भनेका छन् ‘कुनै पनि दल र नेताहरूले हामीलाई सम्झिने भनेको यिनका आमसभा, चुनाव प्रचार प्रसारलगायतका कार्यक्रममा भीड जम्मा पार्ने माध्यम बन्ने र उनीहरूले भाषण गरून्जेल जनता अड्याउने कामका लागि मात्रै हो ।

त्यसैले आफ्नो प्रतिभा र लोकप्रियताको भर परौं, आफ्नो पेसा इमान्दारीका साथ निर्वाह गरी सम्पूर्ण नेपालीको मनमनमा बस्ने काम गरौं, कुनै पार्टीको गोटी भएर हाँसोका पात्र मात्र नबनौं । एमालेले टिकट नदिएपछि कोमल वलीले बिहीबार दाङ ३ बाट स्वतन्त्र उम्मेदवारी दर्ता गराएकी छन् । सो क्षेत्रबाट एमालेका हीराचन्द्र केसी उम्मेदवार बनेका छन् ।